Në vitin 2019, pothuajse 541 mijë persona ndërruan jetë në Europë për arsye që i atribuohen infeksioneve të shkaktuara nga bakteret rezistente ndaj antibiotikëve, për një total prej gati 12 milion vitesh jetë të humbura. Të dhënat jepen në një studim ndërkombëtar të publikuar në “The Lancet Public Health”.
Rezistenca antimikrobike përfaqëson një sfidë të spikatur të kohës sonë, pasi humbja e antibiotikëve efektivë mund të jetë kërcënuese për jetën, për infeksione të përhapura e të pengojë aftësinë për të kryer procedura të zakonshme kirurgjikale dhe trajtime të tjera mjekësore.
Përmes analizës së shkaqeve të vdekjes, kombinuar me prevalencën e baktereve rezistente, studiuesit vlerësuan se në vitin 2019, në Rajonin Europian të OBSH-së, kishte 541 mijë vdekje të lidhura me infeksionet nga bakteret rezistente, 10.5% e vdekjeve totale.
Këto vdekje do të shmangeshin nëse njerëzit nuk e merrnin fare infeksionin. Sidoqoftë, nëse infeksionet do të shkaktoheshin nga baktere të ndjeshme ndaj ilaçeve, 133 mijë prej tyre do të shëroheshin. Numri i viteve të humbura për shkak të sëmundjes shton barrën e rezistencës ndaj antibiotikëve: 11.9 milion.
Referuar studimit, shumica e vdekjeve shkaktohen nga infeksionet sistemike; pasuar nga infeksionet intra-abdominale dhe respiratore. Sa i përket agjentëve përgjegjës për vdekjen, më të zakonshmit janë format rezistente të Escherichia coli, Staphylococcus aureus, Klebsiella pneumoniae, Pseudomonas aeruginosa, Enterococcus faecium, Streptococcus pneumoniae dhe Acinetobacter baumannii.
