Policia ka vënë në pranga dy shqiptarë nga Gostivari dhe Kumanova, me dyshimin se janë të përfshirë në transportimin dhe shitjen e drogës heroinë në Zvicër.
Dy të dyshuarit, Kujtim Aligega nga Gostivari dhe Sabedin Sahiti nga Kumanova, paratë nga biznesi i paligjshëm në Zvicër dyshohet se i kanë sjellë në Maqedoni.
Aksioni i sotëm i policisë u ndërmor pas një hetimi disamujor, që u iniciua nga organet zvicerane të sigurisë, njofton Zhurnal.
Gjatë kontrollit në shtëpitë e dy të dyshuarve, policia gjeti dokumentet e transfertave të shumave të mëdha, dërguar nga Zvicra personave të ndryshëm në Maqedoni.
Policia ka shoqëruar edhe dy persona në cilësinë e dëshmitarëve, ndërsa ka ushtruar kontroll edhe në një agjenci turistike në Gostivar, që dyshohet të ketë qenë e përfshirë në transferimin e parave.
Kujtim Aligega është i njohur për opinionin si kandidat i Demokracisë së Re për deputet i diasporës, në zgjedhjet e vitit 2011.
