Ministri i Jashtëm i Rusisë, Sergei Lavrov, ka thënë se rrëzimi i avionit luftarak rus nga Turqia, në kufirin Turqi-Siri, ka gjasa të ketë qenë “provokim i planifikuar” dhe se aleatët e Ankarasë në NATO po bëjnë përpjekje ta mbulojnë atë.
Lavrov i ka bërë këto komente në Moskë, një ditë pasi avionët turq kanë rrëzuar aeroplanin luftarak të Rusisë, i cili ka qenë duke kryer sulme ajrore në veri të Sirisë.
Një pilot rus ka vdekur në incident.
Lavrov ka thënë se NATO-ja dhe Bashkimi Evropian kanë bërë “vlerësime të çuditshme” të incidentit dhe se nuk kanë shprehur keqardhje ose ngushëllime.
Presidenti i Turqisë, Recep Tayyip Erdogan, ka mbrojtur edhe sot veprimet e zyrtarëve të tij ushtarakë.
“Askush nuk duhet të presë se do të heshtim nëse siguria jonë kufitare shkelet vazhdimisht, nëse të drejtat tona ligjore dhe e drejta jonë për pavarësi dëmtohen”, ka thënë Erdogan.
Turqia insiston se avioni rus ka shkelur hapësirën e saj ajrore, gjë që hidhet poshtë nga Moska.
