Arriti në mbi 7 000 numri i viktimave nga tërmeti i para një jave në Nepal, ndërkohë që qeveria përjashtoi sot të gjitha mundësitë për gjetjen e të mbijetuarve.
“Numri i përgjithshëm i viktimave arriti në 7 040, përfshirë të zhdukurit si edhe 54 qytetarë evropianë”, tha një zëdhënës i qeverisë nepaleze.
“Një javë ka kaluar që prej tragjedisë më të rëndë. Ne kemi bërë të pamundurën përsa i përket operacioneve të shpëtimit dhe ndihmës, por tashmë besoj se nuk ekziston asnjë mundësi për të gjetur të mbijetuar nën gërmadha”, deklaroi zëdhënësi i Ministrisë së Brendshme, Laxmi Prasad Dhakal.
Sipas tij, numri i të plagosurve ka arritur në mbi 15 000.