Kapiteni dhe një anëtar i ekuipazhit i anijes që është mbytur të dielën në ujërat e Mesdheut, duke lënë të vdekur qindra migrantë, janë arrestuar, kanë bërë të ditur zyrtarët italianë.
Të dy ata, që po mbahen nën dyshimet për trafikim me njerëz, janë në mesin e 27 të mbijetuarve që kanë arritur në Sicili të hënën vonë.
Arrestimet vijnë pasi Bashkimi Evropian ka shpallur një plan të veprimit, i cili synon të frenojë valën e migrantëve të paligjshëm nga Afrika dhe Lindja e Mesme, të cilët bëjnë përpjekje të kalojnë Detin Mesdhe dhe të arrijnë në vende të BE-së.
Mbi 700 migrantë besohet se kanë vdekur pasi anija e tyre është mbytur pranë ishullit italian të Lampedusës në natën midis 18 dhe 19 prillit.
