Dhjetëra forca iraniane të sigurisë kanë bastisur një pjesë të burgut Evin të Teheranit, ku mbahen të burgosurit politikë, duke plagosur disa prej tyre.
Raportet e ueb-faqeve opozitare janë konfirmuar nga disa familjarë të të burgosurve.
Vajza e aktivistit të të drejtave të njeriut, Abdolfatan Soltani, i ka thënë Radios Evropa e Lirë se babai i saj është në mesin e të burgosurve që janë rrahur dhe izoluar.
Maedeh Soltani ka thënë se ka marrë informacionet nga burime brenda burgut.
Ueb-faqja “Kalame”, e cila ka publikuar lajmin, ka thënë se bastisja është njëri nga aksionet më të dhunshme kundër të burgosurve politikë në 20 vjetët e kaluar.
