Ish-presidenti Donald Trump ka dalë kryesisht i padëmtuar politikisht nga padia e ngritur kundër tij në Nju Jork. Por një sondazh i ri tregon se hetimet në Xhorxhia dhe Uashington mund të rezultojnë më problematike.
Sondazhi i agjencisë së lajmeve Associated Press dhe Qendra për Kërkimin e Marrëdhënieve Publike NORC zbulon se 4 në 10 të rritur amerikanë besojnë se ish-presidenti Trump ka vepruar në mënyrë të paligjshme në Nju Jork, ku ai është akuzuar në lidhje me pagesat e fshehta të bëra për gratë që pretendonin se kishin patur me të marrëdhënie seksuale.
Sondazhi zbulon se rreth gjysma e të gjithë të rriturve amerikanë besojnë se ai ka thyer ligjin në Xhorxhia, ku ai është nën hetim për ndërhyrje në numërimin e votave në zgjedhjet e vitit 2020.
Sondazhi zbulon se rreth gjysma e të anketuarve mendojnë në mënyrë të ngjashme për rolin e tij në sulmin ndaj Kapitolit më 6 janar 2021 dhe trajtimin e dokumenteve të klasifikuara të gjetura në Mar-a-Lago, të dyja çështje nën hetim nga Departamenti i Drejtësisë.
Anketat tregojnë se akuzat e mundshme në të ardhmen në rastet kundër zotit Trump mund të rezonojnë më thellë me publikun amerikan sesa mbulimi i supozuar i pagesave ndaj aktores së filmave pornografikë Stormy Daniels dhe grave të tjera në kulmin e fushatës së vitit 2016 - akuza që gati 6 në 10 të rritur amerikanë besojnë se ishin të motivuar politikisht. Ndërsa çështja tërhoqi mbulim intensiv mediatik dhe e bëri atë ish-presidentin e parë në historinë e Shteteve të Bashkuara që u akuzua penalisht, ekspertët ligjorë kanë argumentuar prej kohësh se hetimet e tjera paraqesin rrezik potencial shumë më serioz.
Rasti i Xhorxhias, në veçanti, ka të bëjë edhe me disa mbështetës të vjetër të zotit Trump.
Sondazhi ofron prova të mëtejshme se Trumpi është përballur me pasoja të kufizuara politike nga aktakuza, e cila rezultoi në një përfitim masiv për grumbullimin e fondeve. Fushata e tij ka grumbulluar më shumë se 15 milionë dollarë që kur u publikua lajmi i aktakuzës – një pjesë e madhe nga donatorët e rinj.
Ndërsa sondazhi zbulon se vetëm 30% e amerikanëve, përfshirë 55% e republikanëve, thonë se duan që zoti Trump të kandidojë përsëri për president në vitin 2024, këto shifra kanë ndryshuar pak nga një sondazh i AP-NORC i kryer në janar. Mbështetja për zotin Trump ka mbetur gjithashtu konstante: 34% e të rriturve amerikanë në përgjithësi dhe 68% e republikanëve thonë se kanë një opinion të favorshëm për të, ngjashëm me tre muaj më parë.
Megjithatë, ish-presidenti Trump, i cili mbetet kandidati kryesor i padiskutueshëm për nominimin e republikanëve, do të përballet me rryma të kundërta nëse ai fiton nominimin republikan./VOA
