Një pjatë fantastike, shijeplotë dhe e shëndetshme, e pasur me vlerat ushqyese të perimeve më të mira, me të cilat ajo përgatitet.
Shije marramendëse falë kombinimit perfekt të patateve me panxhar të kuq, lakër të bardhë e karrotave.
Supa Borsh me Patate, ndonëse pak e dëgjuar në ditët e sotme, është një ndër recetat më të vjetra të kuzhinës tradicionale shqiptare.
Është konsideruar si supa e dimrit dhe ditëve të ftohta. Shërbehet e ngrohtë dhe shoqërohet me sallata të freskëta të stinës, turshi të ndryshme, bukë të thekur apo edhe byrekë të përgatitur nga duart e nënave dhe gjysheve.
Rikthejmë këtë traditë të vjetër në tryezat tuaja përmes recetës origjinale, e cila përgatitet krejt lehtë në shtëpi.
Përgatitja e Supës Borsh në Shtëpi
Përbërësit
(Përbërësit më poshtë janë për 4-5 persona)
1 litër lëng mishi
3-4 panxhar të kuq
1-2 lugë gjelle uthull
¼ e lakrës së bardhë
1 lugë gjelle salcë domatesh
Dy lugë gjelle vaj ulliri
2 karrota
3 kokrra patate
1 kokër qepë
Ajkë qumështi ose kos i trashë (nga një lugë gjelle për person)
Disa rrënjë selinoje
Një lugë gjelle miell gruri
Kripë
Piper i zi
Përgatitja
Në lëngun e mishit të vluar hidhet lakra e bardhë e prerë në fije të holla.
Në një tenxhere më vete, skuqet qepa, shtohen karrotat, panxhari të prerë në kubikë dhe rrënjët e selinosë e prera hollë në fije shkrepësesh.
Kaurdisen të gjitha së bashku, shtohet mielli duke vijuar kaurdisjen, e më pas salca e domates.
Më pas, shtohet pak nga pak lëngu i mishit dhe dhe lihet që të vlojë.
Në lakrën gjysmën të zjerë, hidhen patatet e prera në kubikë mesatarë, shtohet kripa dhe piperi gjithashtu.
Supa shërbehet sipas racioneve dhe sipër i hidhet një lugë ajkë qumështi ose një lugë kos i trashë secilës pjatë.
