Trajneri spanjoll Pep Guardiola ka bërë thirrje për solidaritet me popullin palestinez, duke tërhequr vëmendjen ndaj situatës humanitare në Gaza dhe duke kërkuar që bota të mos e harrojë Palestinën.
Guardiola, i cili në vazhdimësi ka shprehur shqetësimin për gjendjen e civilëve palestinezë, ka publikuar një video në rrjetet sociale, përmes së cilës ka theksuar se viktimat nuk duhet të trajtohen vetëm si numra.
“Ata nuk janë të vdekur, janë të vrarë. Ata nuk janë thjesht numra. Ata janë jetë me emra, fytyra, familje, ëndrra dhe kujtime. Ata nuk janë viktima civile; ata janë djem dhe vajza. Ne fillojmë të humbasim njerëzimin tonë kur ndalojmë së thirruri me emrat e tyre dhe pranojmë një gjuhë që fsheh dhimbjen. Ne shohim djem dhe vajza në Gaza duke kërkuar prindërit e tyre nën rrënoja. Ne shikojmë britmat e tyre për ndihmë, urinë e tyre, braktisjen e tyre. Ky ferr vazhdon dhe bashkë me të, dehumanizimi i popullit palestinez vazhdon. Solidariteti me Palestinën nuk mund të pezullohet. As përgjegjësia jonë nuk mund të pezullohet”, ka deklaruar Guardiola.
Trajneri spanjoll ka folur edhe për shkatërrimin në Gaza dhe zhvendosjen e palestinezëve në Bregun Perëndimor, duke e cilësuar periudhën aktuale si një nga më të errëtat në historinë e njerëzimit.
“Po jetojmë periudhën më të errët në historinë e njerëzimit. Ndërsa Gaza është në rrënoja, shkatërrimi i shtëpive palestineze dhe zhvendosja e detyruar vazhdon në Bregun Perëndimor. Për dekada ata kanë jetuar në zhvendosje, dhunë, humbje, trauma, pasiguri dhe padrejtësi, e megjithatë nuk dorëzohen. Të heshturit sot është gjithashtu një formë e mbajtjes së anës. Ju lutem, vazhdoni të flisni hapur për Palestinën dhe të mbroni njerëzimin”, ka thënë ai.
Sipas raportimit të mediumit turk “Sabah”, Guardiola ka rikujtuar edhe numrin e lartë të viktimave në Gaza dhe vështirësitë në sigurimin e ndihmës humanitare për popullsinë civile.