Kryeministri Edi Rama përmes një videomesazhi nga salla e Këshillit të Sigurimit të OKB-së në New York theksoi nevojën thelbësore për bashkëpunimin e të gjitha shteteve kundër luftës së Rusisë në Ukrainë.
Kreu i qeverisë do të drejtojë një nga seancat më të rëndësishme të dekadës së fundit, me praninë e shumë krerëve të shteteve dhe qeverive.
Në këtë debat, krerët e shteteve dhe të qeverive të anëtarëve të Këshillit të Sigurimit, të anëtarëve të Kombeve të Bashkuara, përfshi edhe Ukrainën, e cila do të përfaqësohet nga presidenti Volodymyr Zelensky do të kenë mundësi të shprehin pikëpamjet e tyre dhe të shkëmbejnë ide rreth luftës dhe ndikimin që po prodhon mbi paqen e sigurinë ndërkombëtare dhe zhvillimin ekonomik në të gjithë botën.
Rama: Si pjesë e programit të punës të Këshillit të Sigurimit gjatë muajit shtator, nën kryesimin e Shqipërisë, Këshilli do të mblidhet nesër për atë që, me gjasë, është takimi më i rëndësishëm për Ukrainën, qysh prej fillimit të pushtimit në shkallë të gjerë nga Rusia. Do të kem nderin të kryesoj këtë takim. Krerët e shteteve dhe të qeverive të anëtarëve të Këshillit të Sigurimit, si dhe, më gjerë, të anëtarëve të Kombeve të Bashkuara, përfshi Ukrainën, do të kenë mundësi të shprehin pikëpamjet e tyre dhe të shkëmbejnë ide, jo vetëm rreth luftës që po zhvillohet dhe pasojave mbi Ukrainën e popullin e saj, por edhe për ndikimin që po prodhon lufta mbi paqen e sigurinë ndërkombëtare, zhvillimin ekonomik dhe veprimin shumëpalësh. Do të jetë hera e parë, që prej fillimit të luftës, që Presidenti Zelensky do të jetë në Kombet e Bashkuara dhe në Këshillin e Sigurimit.
Rama thekson se shpreson që dita e nesërme të mobilizojë botën në përpjekjet e përbashkëta për të dënuar luftën, rritur trysninë ndaj Rusisë dhe nisjen së një procesi paqeje.
Rama: Shpresoj që ky Debat i Hapur i Nivelit të Lartë të mobilizojë botën në përpjekjet e saj të përbashkëta për të dënuar luftën e për të rritur trysninë ndaj Rusisë, për të kthyer rrugë dhe për t’i lënë vend nisjes së procesit të paqes së drejtë. Duke qenë se vijmë nga një rajon ku lufta ka shkaktuar vuajtje të pamasë, jemi mjaft të ndërgjegjshëm për vlerën e paqes dhe përpjekjet monumentale që duhen për arritjen e, mbi të gjitha, për ruajtjen e saj. Karta e Kombeve të Bashkuara dhe e Drejta Ndërkombëtare shtrojnë themelet e asaj çka quajmë siguri njerëzore. Ato përbëjnë një shkëputje nga e kaluara, me praktikën tradicionale të mbizotërimit, imponimit apo atë të “fuqishmit që ka të drejtë”. Ato sigurojnë barazi mes shtetesh dhe mjete paqësore për zgjidhjen e mosmarrëveshjeve. Ja pse Shqipëria ka vendosur të vendosë theksin te nevoja thelbësore për një veprim efektiv shumëpalësh, si metoda më e mirë për zgjidhjen e problemeve të përbashkëta, sidomos, të paqes e sigurisë, në diskutimin e këshillit dhe, më gjerë, mes anëtarëve të Kombeve të Bashkuara. Pra, u vendos!
Ora 11:00 e së mërkurës do ta gjejë kryeministrin Edi Rama në drejtimin e mbledhjes të Këshillimit Sigurimit, ku për të dytën herë Shqipëria mban Presidencën. Tema për diskutim në Këshill do të jetë “mirëmbajtja e paqes dhe sigurisë ndërkombëtare”.
Rama, i shoqëruar nga ministri i Punëve të Jashtme, Igli Hasani sot zhvilloi takime me shefin e diplomacisë angleze James Cleverly dhe ministrin e Jashtëm të Emirateve të Bashkuara Arabe, Sheikh Abdullah Bin Zayed Bin Sultan Al Nahyan.
