Agjencia amerikane e hapësirës NASA po kërkon katër kandidatë të motivuar për një simulim një vjeçar të jetës në planetin e kuq.
Duke filluar nga pranvera e vitit 2025, katër vullnetarë do të kalojnë 12 muaj në “Mars Dune Alpha” në Houston, një vend simulimi rreth 160 metra katrorë në madhësi, i modeluar sipas një stacioni të imagjinuar të eksplorimit të Marsit, njoftoi NASA të premten.
Stacioni i kërkimit është një strukturë modulare e printuar 3D në Qendrën Hapësinore Johnson në Houston.
Programi do të simulojë sfidat e një misioni në Mars, duke përfshirë kufizimet e burimeve, dështimet e pajisjeve, vonesat e komunikimit dhe faktorët stresues mjedisorë. Detyrat e ekuipazhit përfshijnë shëtitje të simuluara në hapësirë, operacione robotike, mirëmbajtjen e habitatit, stërvitjen dhe kultivimin e të korrave.
Ky është simulimi i dytë i tillë që është pjesë e programit “CHAPEA” (Crew Health And Performance Exploration Analog) të NASA-s, i cili synon të përgatitet për misionet në Mars.
Aplikimet janë të hapura deri më 2 prill dhe aplikantët duhet të kenë një diplomë bachelor në shkencat e natyrës, të jenë nga mosha 30 deri në 55 vjeç, “të shëndetshëm, të motivuar”, jo duhanpirës dhe të jenë shtetas amerikanë ose banorë të përhershëm. Ata gjithashtu duhet të jenë të rrjedhshëm në gjuhën angleze.
