Sipas natyro-patologes Linda Pejxh, detoksifikimi pranveror është një teknikë e rëndësishme për rigjenerimin e organizmit, sado të shëndetshëm që të jeni. Është një dietë shumë e lehtë, që përqendrohet në tretje dhe te zorrët, për të ndihmuar në eliminimin e mbeturinave të akumuluara dhe përmirësuar funksionet e trupit.
Kohëzgjatja e duhur për një pastrim pranveror apo veror mund të jetë 3-5 ditë, ose një fundjavë e zgjatuar, kohë e mjaftueshme për shumë njerëz që t’i përshtaten dietës pa shkaktuar shumë tension në organizëm.
Shenjat treguese për nevojën e një “pastrimi pranveror”
- Shenja fryrjeje, kapsllëku dhe kongjestioni.
- Keni shtuar ndonjë kilogram të padëshiruar, ndonëse nuk po konsumoni ushqim të tepërt.
- Ndiheni të pafuqishëm shumicën e kohës.
- Ju është përkeqësuar tretja.
- E ndieni kraharorin dhe mushkëritë të bllokuara dhe të ënjtura (shenjë e frymëmarrjes së ngadalësuar dhe jo të thellë, ndoshta edhe e mikrobeve infektuese në shkallë të ulët).
Plani ushqyes i “pastrimit pranveror”
Niseni me këtë plan ushqyes 3-5-ditor. Ushqyerja duhet të përqendrohet në ushqime me bimë të freskëta, fruta dhe perime, 8 gota me ujë në ditë.
Një natë para “pastrimit pranveror”, përgatitni një sallatë të lehtë me shumë përbërës të gjelbër.
Për 3-5 ditë:
- Pasi të ngriheni nga shtrati, konsumoni ndonjë produkt pastrues dhe përforcues shkarkimi, ose një lugë çaji me pije fibre në lëng të shtrydhur ose ujë. Shtojini 1 000 miligramë vitaminë C, 3 herë në ditë, për të rritur nivelet e glutationit në organizëm, një përbërës i rëndësishëm detoksifikues.
- Për mëngjes, pini një prej lëngjeve të frutave që ju pëlqen.
- Paradite, pini një pije të gjelbër ose një filxhan me çaj jeshil.
- Në drekë konsumoni një lëng të freskët karotash, ose lakër turshi.
- Në vaktin e pasdites, pini një gotë me lëng molle të saposhtrydhur, ose një çaj pastrues me bimë mjekësore.
- Rreth orës 5 pasdite, konsumoni një racion supë, një lëng të freskët karote ose perimesh.
- Në darkë, supë me 2 lugë gjelle me perime të thata deti, të copëtuara sipër.
- Para se të shkoni në shtrat: pini një filxhan me çaj mente.
- Mbrëmjen e fundit, mbylleni pastrimin tuaj me një sallatë jeshile me lakra brukseli.