Tetë orë gjumë natën në moshën e mesme i bën njerëzit më të mprehtë nga ana mendore kur të arrijnë moshën e tretë, duke shmangur kështu sëmundjen e alzheimerit. Edhe dremitja e pasdites është një ilaç mjaft efikas kundër tekave të kujtesës tek të moshuarit, thonë studiuesit. Ndërkohë, njerëzit që nuk flenë mjaftueshëm rrezikojnë të humbasin shumë nga kujtesa e tyre kur të arrijnë në moshën e pleqërisë.
Profesor Michael Scullin, nga universiteti Baylor në Waco, Texas, i cili drejtoi studimin thotë:
“Kjo ka të bëjë me investimin që bëjmë sot për të marrë kompensim nesër. Njerëzit ndonjëherë e justifikojnë gjumin e pamjaftueshëm me mungesën e kohës. Po gjumi i mirë lidhet drejtpërdrejtë me sëmundjet mendore, përmirëson shëndetin e zemrës dhe shmang disa lloje sëmundjesh”.
Studimi mori në shqyrtim 200 persona që u vëzhguan në disa faza të jetës së tyre, duke nisur që nga viti 1967. Pjesëmarrësit në studim u monitoruan me kujdes duke u pyetur se sa orë flinin natën, sa herë e bënin gjumin e pasdites, sa herë zgjoheshin natën dhe sa herë ndiheshin të përgjumur gjatë ditës.
Studimi i publikuar në gazetën ‘Perspectives On Psychological Science’, sipas shkencëtarëve është prova më e qartë deri tani se çelësi për një pleqëri të shëndetshme është gjumi i mjaftueshëm dhe çlodhja e plotë gjatë natës.
“Ne arritëm në përfundimin se të flesh mjaftueshëm gjatë moshës së mesme, parasheh një mirëfunksionim mendor 30 vite më vonë”, tha profesor Scullin.
