Të akuzuarit në rastin “Lagjja e Trimave” u keqtrajtuan nga policët të cilët i kanë shoqëruar ata deri në gjykatë. Kështu ka deklaruar avokati i popullit Ixhet Memeti, i cili më 21 dhjetor dorëzoi padinë në Prokurorinë Publike dhe tha se posedon prova të mjaftueshme për ta dëshmuar atë. Ndërkaq, ambasadori i Kosovës në Maqedoni, Ylber Hysa, theksoi se institucionet e Maqedonisë duhet ta kryejnë punën në bazë ligjore.
“Ne më herët e kemi ngritur këtë çështje me avokatin e popullit i cili ka ngritë kallëzim penal. Ne presim prej institucioneve të RM që ta kryejnë punën e vet karshi këtij hapi që e ka ngrit Omudsmani i RM”, theksoi për TV21, ambasadori Hysa.
Gjykimi për të dyshuarit në rastin e Kumanovës do të zhvillohet me 23 shkurt.
Nga ana tjetër, Prokurori kompetent publik për ndjekje të krimit të organizuar dhe korrupsionit ka përfunduar procedurën hetimore për shtatë shtetasit e Maqedonisë të cilët u arrestuan në tetor të vitit të kaluar nën dyshimin se kanë qenë të lidhur me grupin e armatosur, të Lagjes së Trimave.
Kjo orokurori bën të ditur se e ka njoftuar mbrojtjen për afatin ligjor deri kur ata mund të hetojnë dëshmitë.
Ndërkohë, sa i përket rastit tjetër, të njohur si Monstra, se a do të ekstradohen të akuzuarit Halili dhe Ismailovic, të cilët në Kosovë kanë vuajtur dënim me burg për tjetër akuzë, por që janë liruar para pak ditësh, ambasadori Hysa u shpreh:
“Kjo është çështje ligjore dhe ne deri në fund do të përpiqemi që përmes të gjitha mënyrave ta shohim si të tillë”, shtoi Hysa.
Për këtë rast u dënuan me burgim të përjetshëm Afrim Ismailoviq, Alil Demiri, Agim Ismailoviq, Fejzi Aziri dhe Sami Luta, për veprën penale “terrorizëm”, ndërsa Haki Aziri si ndihmës në veprën penale “terrorizëm”.
