Avokati Vasiç dorëzoi kërkesën Qeverisë që Kurti të dëshmojë pro Milenkovicit, i dyshuar për krime lufte
Para pak ditësh, avokati Dejan Vasic që mbron të dyshuarin për krime lufte, Dragisha Milenkovic, pati thënë se do ta ftojnë kryeministrin Albin Kurti për të dëshmuar pro tij
Ai ka thënë se tashmë kanë bërë kërkesë në Qeveri.Sipas avokatit, Milenkovici kishte qenë gardian i burgut në kohën kur ishte arrestuar dhe paraburgosur kryeministri aktual i Kosovës që mban emrin Albin dhe mbiemrin Kurti.
Ai pretendon se Kurti ka pasur marrëdhënie të mira me të, dhe se mund të dëshmojë për karakterin e tij.“…jemi marrë vesh, gjegjësisht jemi koordinuar për dëgjimin e dëshmitarit special të mbrojtjes, kryeministrit aktual të Kosovës, z. Albin Kurti, i cili ishte paraburgosur në kohën kur i dyshuari Dragisha ishte duke punuar në burgun e qarkut në Prishtinë.” – u shpreh z. Vasic, shkruan ‘Gazeta Danas’.
Vasic shtoi se “nga ana e tij (Kurti), duhet të thotë dy fjalë për besueshmërinë e të dyshuarit dhe sjelljen e tij ndaj kryeministrit aktual dhe i paraburgosuri i atëhershëm Albin Kurti, të cilit i ka bërë shoqëri gjatë qëndrimit në qeli, i ka sjellë libra për të lexuar, me të cilin e ka kaluar një kohë në biseda”.
Vasic për Kosovo-Online ka thënë se tashmë e kanë dorëzuar kërkesën në Qeverinë e Kosovës për të dëshmuar Kurti.
Milenkovici u arrestua më 21 qershor në fshatin e tij, Kishnicë. Ai dyshohet për krime kundër popullatës civile nga viti 1998 deri më 1999.
Kurti, ashtu si edhe shumë të burgosur tjerë të asaj kohe, ishin përballur me tortura të tmerrshme nga gardianë të ndryshëm të burgut.
