Nëse
nëse tunden lisat
do t'na nxihen plisat
nëse tremben trimat
minjtë dalin nga vrimat
nëse ikën kujtesa
do t'na lërë dhe besa
nëse kënga digjet
do t'na kallen dhe brigjet
nëse vdes burrëria
do t'lëngojë liria...
Edhe
edhe kur nuk ishit
edhe kur nuk ishim
në mendje na kishit
në mendje ju kishim
edhe kur nuk vinim
edhe kur nuk vinit
një gotë për ju e pinim
një gotë për ne e pinit
edhe kur s‘dëgjonim
edhe kur s‘dëgjonit
një këngë e këndonim
një këngë e këndonit
edhe...
Mos u gëzo o i gëzuar mos u hidhëro o i hidhëruar *
herë më ndeshe herë të ndesha
herë qava e herë qesha
herë të ndesha e herë më ndeshe
herë qave e herë qeshe
herë më prite e herë të prita
një minutë zgjati dita
herë të prita e herë më prite
ëndrra këputej në teh drite
botë e madhe rrypa-rrypa
herë më hype e herë të hypa
herë më hype e herë të hypa
veç një lekë bënte kripa...
mos u gëzo o i gëzuar
mos u hidhëro o i hidhëruar...
*popullore
