Cesc Fabregas ka përmendur yllin e Anglisë që do të donte të luante për Spanjën në Euro 2024.
Me fillimin e Euro 2024 në Gjermani pas pak më shumë se dy muajsh, po shtohen diskutimet se cilët lojtarë do të ndriçojnë turneun dhe cili ekip do të triumfojë.
Duke folur për SPORTbible, fituesi i Kupës së Botës dhe Europianit, Cesc Fabregas pranoi se do t’i pëlqente nëse Spanja do të mund të ‘huazonte’ Phil Foden të Cityt për Euro 2024.
“Unë do të preferoja më shumë lojtarë sulmues, më shumë për një numër 10. Mendoj se do të zgjidhja Phil Foden”, tha Fabregas.
“Një lojtar i tipit Foden, mendoj se na duhet te Spanja”.
Ish-lojtari i Arsenalit, Chelseat dhe Barcelonas shpjegoi se aftësitë e Fodenit janë zhvilluar nën drejtimin e Pep Guardiola – duke përfshirë aftësinë e tij për të luajtur në hapësira të ngushta – dhe do ta ndihmonin atë të jepte diçka që ndoshta i mungon Spanjës.
“Unë mendoj se ne kemi nevojë për talent në mesfushë për Spanjën. Lloji i lojtarit që bën diferencën midis linjave, i cili mund të shënojë gola, të japë asiste dhe të ketë produktin përfundimtar”, tha Fabregas.
“Unë mendoj se ne kemi nevojë për këtë në ekipin kombëtar.”
Foden po shijon sezonin më të mirë të karrierës së tij, pasi ka shënuar 21 gola dhe ka dhënë 10 asiste në 41 ndeshje të luajtura në të gjitha kompeticionet për Cityn.
