Napoli barazoi mbrëmë në duel ndaj Barcelonës me rezultatin 1:1, në kuadër të fazës eliminuese të Ligës së Kampionëve.
Në fakt, napolitanët ishin në disavantazh me golin e Robert Lewandowskit në minutën e 60-të, por e arritën barazimin me Victor Osimhen 15 minuta më vonë.
E për golin e pësuar të ekipit italian ka folur Fabio Cannavaro, i cili e ka fajësuar mbrojtësin e kombëtares së Kosovës, Amir Rrahmanin.
“Nëse një mbrojtës e lë topin të kalojë nëpër këmbët e tij, siç bëri Rrahmani në fillim dhe Di Lorenzo më vonë, ju po vrisni efektivisht portierin tuaj.
Rregulli numër një për një mbrojtës është të mos lejosh kurrë që ai top të kalojë nëpër këmbët e tua.
Detyra juaj parësore është të ndaloni topin të dalë”, tha ish mbrojtësi italian.
Ndeshja kthyese mes Barcelonës e Napolit do të luhet më 12 mars.
