Berat Gjimshiti zhvilloi një ndeshje të madhe në “San Siro”. Kapiteni i kombëtares shqiptare dhe “shtylla” e Atalantës në qendër të mbrojtjes, shkëlqeu përballë kuqezinjve.
Zikaltrit e Gasperinit fituan 1-2 dhe u kualifikuan në gjysmëfinalen e Kupës së Italisë, aty ku do të sfidojnë Fiorentinën. Kjo ishte fitorja e dytë e Atalantës përballë skuadrës së Piolit gjatë këtij sezoni. (3-2 në kampionat).
Gjimshiti tregoi saktësi, inteligjencë dhe klas të madh në duelet kundër lojtarëve kundërshtarë, teksa performanca e 30-vjeçarit u vlerësua me notën 7 nga shtypi italian.
“Gjimshiti ishte një ‘mur’ i vërtetë mbrojtës, duke mbyllur hapësirat qendrore me ndërhyrje vendimtare dhe shpeshherë në limite. Sa i guximshëm po aq edhe efektiv.
Kreu disa mbyllje dhe ndërhyrje të ndaluara për njerëzit me zemër të dobët, si ajo ndaj Leoas kur u nis furishëm drejt portës së Atalantës.
Guximi dhe saktësia e tij ua bënë jetën të vështirë kundërshtarëve si Calabria dhe Jovic. Dhe më pas i dha të njëjtin trajtim edhe Giroud kur u fut në fushë”.
