Barazimi 0-0 ndaj Kukësit nuk i jep mundësinë Teutës që të afrohet me zonën e Europës.
Por trajneri Edi Martini e sheh pozitivisht këtë pikë në transfertë pasi ekipi i tij po kalon një moment të vështirë psikologjik, por edhe me dëmtimet.
“Duke pasur parasysh ndryshimet e dëmtimet, e kishim përgatitur që të mos mundeshim.
Ne i patëm mundësitë tona, në pjesën e dytë Kukësi kishte raste më të pastra por ne u mbrojtëm mirë. Jam i kënaqur me një pikë pasi në këto momente është shumë e rëndësishme.
Ne sot kemi ardhur me probleme, Kotobelli u kthye në fushë, sakrifikoi në këto momente po e ndjeu sot përsëri këmbën. U fut Goxhaj edhe pse jo në gjendje optimale, ka ego dhe jep gjithçka për ekipin. Karabeci ishte i dëmtuar, mungonte Vila e Gjinollari, Gruda u fut të sakrifikonte për ekipin, e pashë që nuk kishte mundësi dhe e ndërruam përsëri. Këto mungesa dhe gjendja mendore jo e mirë, na vuri në vështirësi të mëdha.
Djemtë treguan karakter, në fund jam i kënaqur me një pikë edhe pse në fund mund ta fitonim ndeshjen”, tha Martini.
