“Kemi kërkuar pranë FIA-s të rishikohet vendimi për të penalizuar Sainz në Çmimin e Madh të Australisë”.
Numri një i skuadrës të Ferrari-t, Frédéric Vasseur ka qenë i qartë në përgjigjen e dhënë gazetarëve, të cilët interesoheshin nëse “kokëkuqja” do të pranonte ose jo vendimin që morën komisarët e garës në Melburn.
“Në të njëjtën kthesë pati një incident mes Ocon dhe Gasly, por gjyqtarët e garës e vlerësuan ndryshe”, tha Frédéric Vasseur.
Edhe pse sezoni aktual ka nisur në mënyrën më të keqe të mundshme për Ferrari-n, Frédéric Vasseur befasoi duke u shprehur optimist për përmirësimet e vogla në veturë.
“Në Australi ishim të pafat pasi vetura kishte hapin e duhur.
Nuk kishim fat pasi hyri ‘Safety Car’ dhe më pas flamuri i kuq, kështu na u desh që të bënim një ndalim më shumë. Ju afruam më shumë Alonso-s, ndërsa distanca me Red Bull-in ishte më e vogël.
Me këtë dua të them se drejtimi që kemi marrë në përmirësimin e makinës është i drejtë. Një gjë të tillë do të na duhet ta konfirmojmë në Baku”, tha Fréderic Vasseur.
