Kombet e Bashkuara kanë shprehur shqetësim për civilët në rajonin e Idlibit, në Sirinë veriperëndimore, ku forcat qeveritare, me mbështetjen e Rusisë, kanë në plan të fillojnë një ofensivë të madhe, për rimarrjen e zonës së fundit që mbahet nga forcat rebele. I dërguari i Kombeve të Bashkuara për Sirinë, Staffan de Mistura, paralajmëroi se përdorimi i armëve kimike nga secila prej palëve do të ishte e papranueshme. Zyrtari i OKB-së i bëri thirrje qeverisë siriane, që t’i lejojë qytetarët e saj të largohen nga Idlibi, para fillimit të një ofensive, e cila mund të shkaktojë një tjetër krizë humanitare:
Pamjet e civilëve që vuanin pas sulmit të vitit të kaluar me gaz sarin në Khan Sheikhoun, shkaktuan zemërim në shkallë botërore. Ky ishte sulmi më vdekjeprurës me armë kimike në Luftën e Sirisë, pas sulmit të vitit 2013 në Guta, që e detyroi qeverinë siriane të shkatërronte arsenalit e vet të armëve kimike, të ndaluara. Por përdorimi
i agjentëve nervorë sarin dhe klor, tregoi qartë se në Siri nuk ishin eliminuar armët kimike.
"Ne jemi të gjithë të ndërgjegjshëm se si qeveria, edhe Al-Nusra, kanë kapacitetin të prodhojnë klor për armët.”- tha zoti De Mistura.
Të enjten Kombet e Bashkuara i paralajmëruan të dyja palët në konflikt, që të mos përdorin armë kimike në betejën e ardhshme.
Qeveria siriane është e paepur në kërkesën e saj për të rimarrjen e kontrollit të xhepave të veçantë të territorit, që janë ende nën kontrollin e rebelëve.
Por Ministri i Jashtëm sirian tha se Damasku është duke bërë gjithshka të mundur për të shmangur vrasjen e civilëve.
"Me qëllim që të tregonim synimet tona, ne u përpoqëm t’i tërhiqnim civilët përmes aeroportit, me ndihmën e atyre që ishin dorëzuar. Por militantët e Jabhat al-Nusrës i bllokuan përpjekjet tona. Ata ndaluan pjesën më të madhe të njerëzve dhe janë duke i mbajtur tani peng,”- tha Ministri i Jashtëm sirian.
Kryediplomati sirian i bëri këto komente në një konferencë shtypi në Moskë. Rusia dhe Irani mbështesin qeverinë siriane të Presidentit Bashar al-Assad. Shtetet e Bashkuara, Turqia dhe Bashkimi Europian i kanë dënuar masakrat e qeverisë siriane kundër popullit të vet. Edhe Ministri i Jashtëm i Rusisë komentoi në prag të ofensivës së Idlibit:
"U bëjmë thirrje vendeve arabe, Europës dhe Shteteve të Bashkuara, që të heqin doqë nga projektet e njëanshme gjeopolitike,
që mbështesin përpjekjen e përbashkët për të siguruar stabilitet në Siri. Stabiliteti i këtij vendi është shumë i rëndësishëm për sigurinë dhe zhvillimin në Lindjen e Mesme dhe në Afrikën Veriore,”- tha zoti Lavrov.
Idlibi është fortesa e fundit në luftën 7-vjeçare të Sirisë. Pjesa më e madhe e qytetit kontrollohet nga një grup me lidhje me al-Qaidën. Por siç thanë zyrtarët amerikanë, numri i civilëve në rajon është shumë më i madh se ai i rebelëve. Kombet e Bashkuara thonë se ofensiva ushtarake në Idlib mund të shndërrohet në një katastrofë humanitare dhe bëjnë thirrje për bisedime të tjera për shmangien e saj. Armët kimike të ndaluara janë përdorur gjatë gjithë Luftës së Sirisë, ku të dyja palët akuzojnë njëra tjetrën për përdorimin e tyre./voa
