Një forcë siriane antixhihadiste e mbështetur nga SHBA-të, akuzoi sot aviacionin rus se ka ndërmarrë sulme ajrore ndaj luftëtarëve të saj në lindje të Sirisë.
Është hera e parë që Forcat Demokratike Siriane (FDS) shprehen se janë bërë shënjestër e sulmeve ajrore të Rusisë, aleate e regjimit sirian në konflikt. Ato kishin akuzuar edhe më parë regjimin për sulme ajrore ndaj tyre në provincën fqinje të Rakës.
Në këtë luftë komplekse me shumë protagonistë, forcat e mbështetura nga pala ruse dhe ato të mbështetura nga SHBA po ndërmarrin ofensiva të ndryshme për të larguar grupin xhihadist të Shtetit Islamik (ISIS) nga Deir Ezzor, provinca e fundit e kontrolluar nga ISIS-i thuajse në të gjithë territorin e Sirisë.
Ofensiva e proregjimit po përqendrohet në qytetin e Deir Ezzor, kryeqendra e provincës që mban të njëjtin emër që shtrihet në perëndim të provincës së pasur me naftë.
