Ushtria e Pakistanit thotë se nëpërmjet sulmeve ajrore i ka vrarë 20 militantë në pjesën veriperëndimore që kufizohet me Afganistanin.
Sulmet ajrore janë ndërmarrë sot në rajonet fisnore të Vaziristanit Verior.
Duke i cituar zyrtarët e inteligjencës së Pakistanit, agjencia AFP raporton se personat e vrarë ishin luftëtarë të rrjetit terrorist Haqqani, dhe të njësive të komandantit taliban pakistanez në Vaziristanin Verior.
Rrjeti Haqqani është i dyshuar se ka dorë në sulmin vetëvrasës para dy ditësh në një takim volejbolli, me ç’rast ishin vrarë 57 vetë.
Ushtria e Pakistanit thotë se i ka pastruar 80% të territorit të Vaziristanit Verior nga militantët, prej se e ka filluar ofensivën madhore në muajin qershor.
