Administrata e presidentit të ri argjentinas Javier Milei njoftoi sot se do të pushojë nga puna më shumë se 5000 nëpunës civilë që u punësuan këtë vit, përpara se ai të merrte detyrën.
Masa është pjesë e një plani gjithëpërfshirës të uljes së kostove dhe reformës monetare që synon transformimin e ekonomisë së Argjentinës, të shpallur nga Milei i krahut të djathtë kur ai mori detyrën më 10 dhjetor.
Do të vazhdohen kontratat me punonjës të tjerë shtetërorë që janë punësuar para vitit 2023, njoftuan zyrtarët shtetërorë. Pushimet nga puna kanë shkaktuar tashmë protesta, por Milei është zotuar se do t’i vazhdojë ato.
Me inflacionin që pritet të arrijë rreth 200 për qind deri në fund të vitit, Milei është zotuar të shkurtojë burokracinë dhe kostot shtetërore dhe të lejojë privatizimin e industrive shtetërore si një mënyrë për të nxitur eksportet dhe investimet.
Përafërsisht 300 ndryshime ligjore të shpallura më parë do të mundësojnë privatizimin e shumë ndërmarrjeve shtetërore dhe do të lehtësojnë mbrojtjen për qiramarrësit, punonjësit dhe klientët.
Hapat e tjerë përfshijnë zhvlerësimin e pesos argjentinase me 50 për qind, shkurtimin e subvencioneve për energjinë dhe transportin dhe mbylljen e disa ministrive të qeverisë.
