Njerëzit në Islandën jugperëndimore mbeten të shqetësuar ndërsa presin të shohin nëse një vullkan nën gadishullin Reykjanes do të shpërthejë.
Autoritetet e mbrojtjes civile thanë se edhe nëse nuk ndodh, ka të ngjarë të kalojnë muaj para se banorët e evakuuar nga zona e rrezikut të kthehen të sigurt në shtëpi.
Qyteti i peshkimit Grindavik u evakuua një javë më parë pasi magma ishte gati të shpërthente nën tokë mes mijëra tërmeteve. Aktiviteti sizmik ka lënë një çarje të thepisur që kalon nëpër qytet.
Zyra meteorologjike islandeze tha se kishte një "gjasë të konsiderueshme" që një shpërthim do të ndodhte diku përgjatë tunelit të magmës 15 kilometra dhe se "lokacioni kryesor" ishte një zonë në veri të Grindavik, pranë malit Hagafell.
Grindavik, një qytet me një popullsi prej 3400 banorësh, ndodhet në gadishullin Reykjanes, rreth 31 milje në jug-perëndim të kryeqytetit, Reykjavik, dhe jo shumë larg aeroportit “Keflavik”, objekti kryesor i Islandës për fluturimet ndërkombëtare.
Vendpushimi gjeotermik i Lagunës Blue, një nga atraksionet kryesore turistike të Islandës, është mbyllur të paktën deri në fund të nëntorit për shkak të rrezikut nga vullkani.
Njerëzit në Grindavik janë lejuar të kthehen për pesë minuta secili për të shpëtuar pasuritë e vlefshme dhe kafshët shtëpiake.
Një sistem vullkanik në gadishullin Reykjanes ka shpërthyer tre herë që nga viti 2021, pasi ishte i fjetur për 800 vjet. Shpërthimet e mëparshme kanë ndodhur në lugina të largëta pa shkaktuar dëme. /The Guardian
