LIVE: Putin në dilemë të madhe; Rusia ndryshon skenarin - ja çfarë do të ndodhë 6 muajt e ardhshëm në Ukrainë

Përpara nisjes së luftës në Ukrainë ka pasur një komplot për vrasjen e presidentit ukrainas, Volodymyr Zelensky.

Sipas burimeve nga mediat e huaja, drejtori i CIA-s paralajmëroi Zelenskyn për planet e Moskës për ta vrarë atë përpara pushtimit rus, sipas autorit Chris Whipple.

Libri i tij i ardhshëm, “Lufta e jetës së tij: Brenda Shtëpisë së Bardhë të Jo Biden”, detajon një udhëtim të fshehtë të kreut të agjencisë së spiunazhit, Bill Burns, në Kiev, ndërsa Zelensky ishte duke minimizuar mundësinë e një pushtimi tokësor, raporton Independent.

Presidenti Joe Biden i kërkoi zotit Burns t’i jepte Zelenksyy detaje specifike të komploteve ruse, sipas sajtit të lajmeve.

Kujtojmë se lufta në Ukrainë po vijon që prej 24 shkurtit të këtij viti, ku deri më tani kanë humbur jetëm mijëra viktima nga agresioni i pajustifikuar rus.

Sipas analistëve të Institutit Amerikan për Studimin e Luftës, në gjashtë muajt e ardhshëm Rusia do të  jetë në përpjekje e sipër që të fitojë një avantazh në fushën e betejës ukrainase. Në këtë periudhë gjashtë mujore, rusët do të përpiqen të riparojnë gabimet që kanë bërë deri më tani  si nga dështimi i Blitzkrieg, dështimi për të kontrolluar gjithë Donbasi që përfundoi me disfatë të vërtetë, si dhe gabimi që bënë forcat ruse kur braktisën zonën në juglindje ku nëpërmjet kësaj zone ata do të mund të merrnin nën kontroll Ktherson si dhe një pjesë të rajonit Zaporizhia. Por është anashkaluar diçka nga ky institut, forcat ruse do të kryejnë një ofensivë të madhe në rajonin e Luhanskut si dhe do të përpiqen të  marrin pozicion dhe të gërmojnë në zonën e juglindjes (Kherson - Krime) në mënyrë që të çaktivizojnë avancimin ukrainas në atë pjesë të fushëbetejës si dhe të parandalojnë depërtimin e tyre drejt Detit Azov i cili kontrollohet totalisht nga Rusia.

Një ndër qëllimet e aksionit strategjik vendimtar është të ngadalësojë kundërsulmet e Ukrainës dhe të privojë ushtrinë ukrainase nga iniciativa që ka aktualisht, për të shkatërruar më pas forcat ukrainase totalisht. Po kështu, analistët amerikanë të luftës besojnë se deri më tani nuk ka indikacione apo prova që tregon se rusët kanë përgatitur forca të mjaftueshme për të tentuar një përparim të ri vetëm nga Bjellorusia ose në bashkëpunim me ushtrinë bjelloruse drejt Kievit. Mos harrojmë se shumë analistë ukrainas janë shprehur se Rusia po përgatit një ofensivë të re kundër Kievit dhe veriut të Ukrainës që pritet të ndodhe në pranverë. Ndaj dhe forcat ukrainase gërmuan përgjatë kufirit Bjellorusi, ndërtuan pengesa të shumta, llogore dhe fusha të minuara dhe rreth Kievit u vendosën katër linja mbrojtjeje me një gjatësi totale prej rreth një mijë kilometrash.

Taktika e re e Rusisë

Rusia po ndryshon taktikën sepse është evidente se edhe plani i ish-komandantit të forcave ruse në Ukrainë, Sergey Surovikin nuk solli rezultate e pritura. Plani i tij ishte të shkatërronte energjinë dhe infrastrukturën ruse me qëllim kthimin e Ukrainës në epokën gurit. Një gjë e tillë do të demoralizonte popullatën ukrainase, por ky plan  edhe pse u realizuar pikë për pikë nuk solli rezultatet e pritura. Kjo  ishte  dhe një arsye që solli largimin nga detyra të Sergey Surovikin dhe në vend të tij u emërua gjenerali Valery Gerasimov që njihet ndryshe si shefi i shtabit të përgjithshëm të ushtrisë ruse si dhe babai i doktrinës ruse të luftës. Për arsyet e lartpërmendura pritet që Rusiatë forcojë forcat e saj të armatosura me personel shtesë  dhe për këtë do të ketë një valë të re të mobilizimit. Kujtojmë se vetëm pak ditë më parë lideri rus nxori ligjin për rekrutim të ri si dhe njoftoi për forcim të industrisë ushtarake  dhe prodhimit të armëve. Së fundmi  është spekuluar se ai do ta shpallë vendin e tij në gjendje lufte, ku lideri rus deri më tani i është shmangur kësaj duke e quajtur pushtimin e Ukrainës si operacion ushtarakë specialë. Kreu i shërbimit të inteligjencës ushtarake të Ukrainës Andriy Yusov thotë se Putini do të përdore strategjinë e shkatërrimit dhe të  luftës deri në pikën e rraskapitjes. Ndërsa Ukraina do të përpiqet t'i japë fund luftës në vitin 2023 me një  fitore heroike.

Bjellorusia së shpejti pjesë e luftës

Dyshohet se Bjellorusia së shpejti mund t'i bashkohet luftës ose  më saktë do të jetë Rusia ajo që do të përfshije dhe Bjellorusinë në këtë valle pasi nga 16 janari dhe deri me 1 shkurt do të zhvillohen manovra ushtarake të forcave ajrore të të dy vendeve, duke përfshirë patrullimin e përbashkët. Nga të dy vendet këto stërvitje ushtarake u prezantuan si mbrojtja e shtetit federal të Rusisë dhe Bjellorusisë. Rusia ka vendosur prej muajsh ushtarë të mobilizuar përgjatë kufirit ukrainas.  Rusia dërgoi në territorin Bjellorus sistemet raketore S-400 dhe Iskander, dhe bombarduesit rus tashmë janë kalibruar në Bjellorusi për të mbajtur armë bërthamore. 

Me pak fjalë, Bjellorusia është bërë tashmë një bazë ushtarake ruse dhe terren trajnimi për sulmet ndaj Ukrainës.

Kapja e Soledarit nga Rusia ka zbuluar prapaskena të forta brenda fuqisë ruse. Vladimir Putini ka një detyrë të vështirë përpara tij, në të cilën do t'i duhet të balancojë interesat konfliktuale të të gjitha atyre forcave që marrin pjesë në pushtimin e Ukrainës. Kështu, të paktën, pretendon komandanti famëkeq i njësive paraushtarake nga Donbasi, i dënuari terrorist Igor Girkin. Ushtria ruse njoftoi të premten e kaluar se kishte pushtuar qytetin Soledar, i cili teorikisht duhet ta lejonte të përparonte drejt qytetit Bahmut, pak më në jug, ku luftime të ashpra po zhvillohen prej muajsh.

Kreu i grupit wagner, Yevgeny Prigozhin, më vonë, në një fjalim të veçantë, pohoi se Soledar nuk u kap nga ushtria ruse, por se kapja e qytetit ishte rezultat i përpjekjeve të mercenarëve të tij. Ministria ruse e Mbrojtjes në fillim nuk e pranoi rolin e kompanisë private ushtarake në pushtimin e Soledar, por përfundimisht u përkul para presionit të Prigozhin. Beteja se kush do të marrë meritat për avancimin e supozuar vazhdon. Girkin pohoi në kanalin e tij të mediave sociale Telegram se kishte një "konflikt akut" midis forcës së pushtimit jozyrtar dhe komandës tradicionale ushtarake ruse. Ai gjithashtu theksoi se një dinamikë e tillë në vorbullën e luftës është "plotësisht e papranueshme".

Lufta brenda Rusisë

Ai gjithashtu thekson se rreziku më i madh për operacionet e grupit wagner në Ukrainë përfaqësohet nga kreu i Shtabit të Përgjithshëm rus Valeriy Gerasimov, i cili së fundmi u promovua në pozicionin e komandantit të të gjithë fushatës ukrainase. Thuhet se Gerasimov dhe ministri i Mbrojtjes Sergei Shoigu duan të shpërndajnë grupin Ëagner dhe të përfshijnë trupat mercenare në ushtrinë e rregullt ruse. Kjo do t'i largonte të gjithë ata që personalisht i konsiderojnë Shoigu dhe Gerasimov si armiq politikë, thekson Girkin.

Sipas hulumtimit të Institutit për Studimin e Luftës (ISW), komentet e Girkin zbulojnë gjithashtu një dilemë të madhe për Putinin. Nga njëra anë, lini Wagnerin në luftë, nga ana tjetër, hiqni Prigozhin dhe eliminoni ndikimin e tij politik në rritje. Rasti i fundit do të forconte pozicionin e komandës tradicionale ushtarake ruse, veçanërisht Sergei Shoigu, ministri rus i Mbrojtjes. Por Shoigu, kjo është e sigurt, nuk renditet mirë në rrethin e brendshëm të Putinit, thotë Girkin. Si do të dukej mënyra për të dalë nga kjo situatë? Sipas Girkin, Putinit do t'i duhet të ndalojë praktikën e distancimit nga dështimet ushtarake në Ukrainë dhe "të pranojë personalisht rolin e komandantit të përgjithshëm".

"Presidenti i është shmangur me kokëfortësi përgjegjësisë personale për 11 muaj," shkruan Girkin, duke shtuar se Putini së shpejti do të duhet të zgjedhë midis Prigozhin, Shoigu, ose t'i marrë gjërat në duart e tij. ISW thekson se zvarritja e Putinit në përpjekjen për të arritur një ekuilibër midis këtyre dy faktorëve "mund të ndikojë seriozisht në fuqinë e tij".

Paralajmërimi i gjeneralit italian

Lufta ruso-ukrainase do të vazhdojë për një kohë të gjatë, siç parashikoi gjenerali italian Maurizio Boni, nga viti 2007 deri në vitin 2010 i dërguar në komandën e përbashkët të NATO-s në Lisbonë, nga viti 2011 deri në 2012 komandanti i brigadës së kalorësisë "Pozzuolo del Friuli" dhe nga 2014 deri 2016 Shefi i Shtabit të Trupave të Shpejtë të Dislokueshme të NATO-s. 

“Sektori Bakhmut, me Soledarin afër, ka qenë gjithmonë jashtëzakonisht i rëndësishëm për rusët, të cilët nuk kanë pushuar kurrë së sulmuari atje edhe kur u refuzuan në zona të tjera, si në Kharkiv. Shtylla kurrizore e forcave ruse në atë zonë përbëhet nga grupi Wagner, udhëheqësi i të cilit Evgeni Prigozhin po kërkon dukshmëri politike për t'i demonstruar Presidentit Vladimir Putin se ai vlen më shumë se gjeneralët tradicionalë. Megjithatë, Bakhmuti është i vlefshëm sepse është porta për në pjesën e Donbasit që ende nuk është pushtuar nga rusët. Nëse ata marrin plotësisht zonën e Bakhmutit, rusët do të kenë një pozicion të avancuar në të cilin do të rivendosin artilerinë e tyre dhe më pas do të kryejnë një zjarr të thellë në pjesën e pasme të armikut”, u shpreh gjenerali italian.

Politikani opozitar rus, Aleksei Navalny, ka thënë se mbetet me shpresë që “hajnat” që po tentojnë të vjedhin shtetin e Rusisë nga banorët, do të dështojnë dhe do të hiqen nga pushteti.

Ai e ka bërë këtë deklarim në llogaritë e tij në rrjetet sociale, pikërisht dy vjet pas arrestimit të tij.

Navalny është ndaluar në momentin e kthimit në Moskë nga Gjermania, ku është trajtuar për helmim me agjent nervor të stilit sovjetik.

Kritiku i Kremlinit ka thënë se “toka amë duhet të ruhet”.

“Ajo [Rusia] është vjedhur, lënduar dhe është futur në një luftë agresive kundër Ukrainës, dhe është kthyer në një burg të pandershëm nga njerëzit më të pandershëm dhe mashtrues. Secili qëndrim kundër kësaj bande, qoftë edhe simbolik, është i rëndësishëm”, është thënë në deklaratën e Navalnyt.

“Siç e kam thënë edhe dy vjet më parë, po e them edhe tash – Rusia është shteti im… nuk do t’ua jap atyre shtetin tim dhe besoj se terri do të zhduket… ka shumë në mesin tonë, sigurisht, më shumë sesa gjyqtarët e korruptuar, propagandistët gënjeshtarë dhe hajnat e Kremlinit”.

Navalny, i cili ka qenë në gjendje të rëndë shëndetësore në gusht të vitit 2020, fajëson zyrtarët rusë të sigurisë për helmimin e tij, me urdhër të presidentit rus, Vladimir Putin.

Ai është dënuar fillimisht me dy vjet e gjysmë burgim për shkelje të rregullave të një dënimi me kusht, dhe më pas i janë shtuar edhe nëntë vjet më shumë, me arsyetimin e mashtrimeve.

Vetë Navalny i ka hedhur poshtë të gjitha akuzat dhe i konsideron ato të motivuara politikisht.

Presidenti rus, Vladimir Putin ka thënë të martën se ekonomia ruse mund të jetë tkurrur 2.5 për qind më 2022, mirëpo ka pasur performancë më të mirë sesa që e kanë pritur shumë ekspertë.

Putin i ka bërë këto deklarata pas një takimi me zyrtarë të lartë rusë, përfshirë ministrin e Financave dhe shefin e Bankës Qendrore, dhe ka thënë se duhet të stimulohet rritja e pagave.

“Dinamika aktuale ka qenë më e mirë sesa që e kanë parashikuar shumë ekspertë. Sipas Ministrisë për Zhvillim Ekonomik, bruto-prodhimi i brendshëm i Rusisë në periudhën janar-nëntor 2022 është ulur, mirëpo vetëm 2.1 për qind”, ka thënë Putin.

“Shumë ekspertë në shtetin tonë, pa i menduar të huajt, kanë parashikuar ulje prej 10 dhe 15 për qind, madje edhe 20 për qind. Për vitin në përgjithësi, ulja pritet të jetë 2.5 për qind”, ka thënë ai.

Lufta në Ukrainë dhe vendosja e sanksioneve perëndimore kanë dëmtuar shumë sektorë të ekonomisë ruse, përfshirë edhe kufizimin e eksporteve të naftës dhe gazit.

Derisa qeveria dhe banka qendrore kanë pranuar vështirësitë, Moska ka thënë se ekonomia e saj është e qëndrueshme dhe se sanksionet i janë kthyer bumerang Perëndimit, duke rezultuar me rritje të inflacionit dhe çmimeve të energjisë.

Lufta në Ukrainë ka nisur më 24 shkurt të vitit 2022.

Presidenti rus, Vladimir Putin e quan luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.

Komisioni Evropian pagoi sot këstin e parë prej tre miliardë eurosh nga paketa e ndihmës makrofinanciare prej 18 miliardë eurosh për Ukrainën.

Vendimi u njoftua nga presidentja e KE Ursula von der Leyen nga Davos.

“Dje Komisioni ka dhënë tre miliardë euro mbështetje financiare. Ky është kësti i parë i paketës sonë të mbështetjes prej 18 miliardë eurosh për vitin 2023. Kjo do të forcojë stabilitetin financiar të Ukrainës, do të ndihmojë në pagimin e pagave dhe pensioneve dhe do të sigurojë funksionimin e spitaleve, shkollave dhe shërbimeve të strehimit”, tha ajo në një fjalim në Davos.

Von der Leyen shtoi se BE-ja ka futur "sanksionet më të forta ndonjëherë, për shkak të të cilave ekonomia ruse përballet me një dekadë regresioni dhe industria e saj nuk ka asnjë teknologji moderne dhe kritike".

“Nuk do të ketë pandëshkueshmëri për krimet ruse. Dhe nuk do të ketë asnjë ndalim në mbështetjen tonë të palëkundur për Ukrainën – nga ndihma për të rivendosur energjinë elektrike, ngrohjen dhe ujin, deri te përgatitja për përpjekjet afatgjata të rindërtimit”, tha Von der Leyen.

Siç njoftoi Komisioni, bëhet fjalë për "mbështetje financiare të qëndrueshme, të rregullt dhe të parashikueshme që do t'i mundësojë Ukrainës të sigurojë stabilitet makroekonomik dhe të rindërtojë infrastrukturën kritike të shkatërruar nga Rusia në luftën e saj të agresionit, si infrastruktura energjetike, sistemet e ujit, rrjetet e transportit, rrugët dhe urave”.

Pagesat e ardhshme për Ukrainën do të arrijnë në 1.5 miliardë euro në muaj, duke filluar nga marsi, dhe do të kushtëzohen nga përparimi i kënaqshëm drejt zbatimit të kushteve të miratuara të reformës.

Për të financuar këto kredi, Komisioni merr hua nga tregjet e kapitalit si pjesë e qasjes së tij unike të financimit.

OKB ka bërë me dije se më shumë se 7 mijë civilë janë vrarë që prej nisjes së luftës së Rusisë në Ukrainë.

Zyra e të drejtave të OKB-së sqaroi se ka konfirmuar 7,031 vdekje civile, teksa shton se beson se numri aktual i viktimave është më i lartë, duke pasur parasysh konfirmimin në pritje të shumë raporteve dhe paarritshmërinë e zonave ku po zhvillohen luftime intensive.

“Shumica e viktimave civile të regjistruara u shkaktuan nga përdorimi i armëve shpërthyese me efekte të zonës së gjerë, duke përfshirë granatimet nga artileria e rëndë, sistemet e raketave të shumta lëshuese, raketat dhe sulmet ajrore”, thuhet në një deklaratë të OHCHR.

Shumica e vdekjeve të civilëve të regjistruara ndodhën në zonat e kontrolluara nga qeveria e Ukrainës, 6,536 krahasuar me 495 të regjistruara në zonat e kontrolluara nga Rusia. OHCHR nuk atribuoi përgjegjësinë për vdekjet.

Ukraina thotë se numri i civilëve të vrarë mund të shkojë në dhjetëra mijëra. Të dy vendet mohojnë të kenë shënjestruar civilët.

Ministri i jashtëm britanik James Cleverly do të inkurajojë mbështetjen për Ukrainën gjatë një udhëtimi në Shtetet e Bashkuara dhe Kanada që fillon të martën, përpara se të mbushet një vit nga sulmi i Rusisë.

Britania ka qenë një mbështetëse e vendosur e Kievit që nga fillimi i sulmit të Rusisë shkurtin e kaluar, dhe premtoi gjatë fundjavës se do të dërgojë 14 tanke të tipit Challenger dhe armatime të tjera të rënda drejt Ukrainës.

Gjermania është gjendur nën presion për të dërguar tanket e tipit Leopard 2 në Ukrainë, por qeveria gjermane thotë se tanke të tilla duhet të dërgohen në Ukrainë vetëm nëse ka dakortësi mes vendeve kryesore aleate të Kievit, në veçanti Shtetet e Bashkuara.

Lexo edhe Lufta në Ukrainë ka marrë kthesë të fuqishme, Rusia ‘kërcënon’ hapur Perëndimin – Erdogani telefonon Putinin!

Zoti Cleverly do t’i thotë Sekretarit amerikan të Shtetit Antony Blinken dhe homologes kanadeze Melanie Joly se kjo është koha e duhur për të ecur “më tej dhe më me shpejtësi” në dhënien e mbështetjes ushtarake për Ukrainën.

“Sot qëndrojmë të bashkuar kundër luftës ilegale të Putinit, dhe do të vazhdojmë të përdorim lidhjet në veçanti të forta në fushën e mbrojtjes dhe të sigurisë, për t’u siguruar se në fund, do të fitojë populli ukrainas”, u shpreh zoti Cleverly në një deklaratë përpara udhëtimit.

Ministria e jashtme britanike tha gjithashtu se zoti Cleverly do të ngrejë temën e Iranit gjatë vizitës, pasi Britania ka thërritur përkohësisht ambasadorin e saj pas ekzekutimit të shtunën të shtetasit britaniko-iranian Alireza Akbari./VOA

Megjithëse janë vetëm ditët e para që ushtarakët ukrainas po marrin pjesë në një program të ri stërvitor të ushtrisë amerikane, mesazhi që po jepet ishte i qartë.

Kohërat janë urgjente. Dhe mësimet që ata do të përfitojnë gjatë pesë javëve në vazhdim për përdorimin e armëve, për autoblindat dhe teknikat më të sofistikuara të luftimit janë jetike, ndërsa përgatiten që të mbrojnë vendin e tyre nga sulmi i forcave ruse.

“Ky nuk është një nga rotacionet e zakonshme”, tha Gjenerali Mark Milley, shefi i shtabit të forcave të armatosura të Shteteve të Bashkuara, ndërsa u takua të hënën me komandantët ushtarakë. “Ky është një nga ato momente në kohë, kur nëse dëshiron të bësh ndryshimin – ky është momenti”.

Gjenerali Milley, që vizitoi bazën Grafenwoehr për të parë nga afër programin e ri përgatitor për të gjitha llojet e armëve, tha se programi do të përgatisë më mirë forcat ukrainase për t’u hedhur në ofensivë ose për të përballuar një rritje të sulmeve ruse.

Ai kaloi mbi dy orë në “Kampin Kherson”, një pjesë e bazës e emërtuar sipas qytetit ukrainas ku u shënua fitorja e rëndësishme e forcave ukrainase kundër Rusisë. Një ditë përpara vizitës së Gjeneralit Milley, mbi 600 ushtarakë ukrainas filluan programin e zgjeruar stërvitor.

Për herë të parë nga fillimi i luftës, gazetarëve iu mundësua qasja tek disa pjesë të programit stërvitor. Gazetarët u lejuan ta shoqëronin Gjeneralin Milley dhe të ndiqnin komunikimin e tij me ushtarakët dhe komandantët ukrainas dhe amerikanë, por nuk iu lejua të raportojnë për detajet e bisedave me forcat ukrainase, apo të merrnin filmime dhe fotografi. Kufizimi reflekton shqetësimet e vazhdueshme të Shteteve të Bashkuara për përshkallëzimin e zemëratës ruse për përfshirjen e Perëndimit në luftë, apo shkaktimin e një konflikti më të gjerë.

Shtetet e Bashkuara kanë patur programe stërvitore prej vitesh në Grafenwoehr, ndër të tjera edhe për forcat e vendeve aleate në Evropë. Por stërvitja e kufizuar për forcat ukrainase filloi vitin e kaluar, pak pasi filloi sulmi rus. Në atë periudhë, programi ishte i përqëndruar tek sisteme të caktuara që po jepeshin nga Shtetet e Bashkuara, si artileria e rëndë.

Muajin e kaluar, Pentagoni njoftoi se do ta zgjerojë programin në përpjekje për të përmirësuar aftësitë e forcave ukrainase. Kursi pesë-javor do t’u mësojë atyre lëvizjen dhe koordinimin me efektshmëri në njësitë e tyre deri në përmasat e batalionit, përdorimin e sistemeve të kombinuara të artilerisë, të njësive të blinduara dhe njësive të tjera tokësore.

Stërvitja në kampin Grafenwoehr drejtohet nga Komanda e 7-të Stërvitore e Ushtrisë Amerikane.

Gjenerali Milley tha të dielën se objektivi është që armë dhe paisje të reja të dërgohen në Ukrainë, në mënyrë që forcat e sapo-stërvitura të jenë në gjendje t’i përdorin “dikur përpara se të fillojnë shirat e pranverës. Kjo do të ishte ideale”.

Programet e reja përgatitore vijnë ndërsa analistët perëndimore sjellin në vëmendje treguesit se Kremlini po përgatitet për një luftë të zgjatur, dhe se komanda ushtarake ruse po përgatitet për një mobilizim ushtarak më të zgjeruar./VOA

Kremlini tha të hënën se tanket që Britania planifikon të dërgojë në Ukrainë “do të digjen”.

Britania tha të shtunën se do të dërgojë 14 nga tanket e saj kryesore të betejës Challenger 2, si dhe mbështetje të tjera të avancuara artilerie në javët e ardhshme.

Zëdhënësi i Kremlinit Dmitry Peskov tha se furnizimet e reja me armë nga vende si Britania dhe Polonia nuk do ta ndryshonin situatën në terren dhe vetëm do të sillnin më shumë telashe në Ukrainë. Tanket e reja do të “digjen si të tjerët”, tha ai.

Sulmi Dnipro

Gjatë një telefonate me gazetarët, zëdhënësi i Kremlinit Dmitry Peskov tha gjithashtu se “Forcat e Armatosura Ruse nuk godasin ndërtesat e banimit apo objektet e infrastrukturës sociale. Sulmet bëhen ndaj objektivave ushtarake, të dukshme ose të maskuara”.

Forcat Ajrore të Ukrainës thanë se kompleksi i apartamenteve u godit nga një raketë ruse Kh-22, të cilën Kievi thotë se nuk ka pajisje për ta rrëzuar.

Peskov sugjeroi se sulmi kishte qenë rezultat i një “kundër-rakete kundërajrore” ukrainase që përgjonte raketën ruse, duke thënë se “disa përfaqësues të palës ukrainase” kishin arritur të njëjtin përfundim.

Oleksiy Arestovych, i cili këshillon zyrën e presidentit ukrainas, tha të shtunën në mbrëmje se dukej sikur raketa ruse kishte rënë në ndërtesën e banesës pasi u qëllua nga mbrojtja ajrore ukrainase. Komenti ngjalli zemërim në Ukrainë, duke e shtyrë atë të kërkojë falje. Ai më pas tërhoqi faljen e tij në internet, duke thënë se ai e kishte bërë të qartë në komentet e tij fillestare se përfundimi i tij ishte vetëm një teori paraprake.

Dnipro, një qytet me pothuajse një milion banorë, i cili shërben si një qendër furnizimi thelbësore për forcat ukrainase në rajonin lindor të Donbasit, është nën bombardime të vazhdueshme nga raketat ruse.