Me ftesë të Universitetit të Gjakovës, “Fehmi Agani”, Zëvendëskryeministrja dhe Ministrja e Punëve të Jashtme dhe Diasporës, Donika Gërvalla ka mbajtur sot një bashkëbisedim me studentët e Fakultetit të Shkencave Shoqërore, me temë “Kosova: Sfidat, mundësitë dhe vizioni për të ardhmen”.
Këtij bashkëbisedimi i parapriu një takim me rektorin e këtij universiteti, Dr.Drilon Bunjaku, prorektorët si dhe dekanin e Fakultetit të Shkencave Shoqërore, Dr.Ferdi Kamberi, ku u diskutua rreth bashkëpunimit në shkëmbimin e stafit akademik me shtetet evropiane, ku ministrja Gërvalla ofroi mbështetjen e saj.
Para studentëve ministrja Gërvalla foli rreth kontributit dhe sakrificës së gjeneratave të shumta për çlirimin e vendit, duke përfshirë edhe studentët, demonstratat e tyre dhe luftën për çlirim duke theksuar se gjithë ajo punë, sakrificë dikur, duhet të shërbejë sot shembull që të rinjtë tanë të punojnë pa u ndalur në fuqizimin dhe zhvillimin e vendit.
Ajo foli edhe për sfidat e shumta me të cilat është përballur Kosova gjatë viteve duke u nisur nga imazhi i keq në botë, keq-qeverisja, korrupsioni, nepotizmi duke listuar më tej të arriturat e qeverisjes aktuale si në sundimin e ligjit, shtrirjen e sovranitetit në gjithë vendin, zhvillimin ekonomik si dhe fuqizimin e subjektivitetit ndërkombëtar të Republikës së Kosovës.
“Rinia, potenciali i jashtëzakonshëm i tyre, shkathtësitë në njohuri digjitale, programet e qeverisë për punësimin e të rinjve si dhe vizioni për të ardhmen ishin çështjet tjera që u diskutuan gjatë bashkëbisedimit dhe ku studentët shprehën pikëpamjet e tyre për zhvillimin e shtetit në sektorë të ndryshëm si dhe shtruan për diskutim çështje me interes publik përmes pyetjeve dhe komenteve”, thuhet në komunikatën e MPJD-së.
