Xhavit Haliti ka paralajmëruar se tifozët e klubit futbollistik “Crvena Zvezda” e Beogradit, janë duke u përgatitur për veprime terroriste në Kosovë.
Lidhur me këtë deklaratë ai tha se këtë tifozë kanë disa poligone në Serbi në të cilat po ushtrohen dhe qëllimi i tyre është ta destabilizojnë Kosovën e të kryejnë atentate e veprime që mund ta fusin edhe policinë e Kosovës në aventura.
“Nuk erdhen kot forcat e NATO-s në Kosovë që u shtuan, ata erdhen edhe me i thënë Qeverisë së Kosovës stop se ne jemi për sigurinë këtu, dhe me iu thënë atyre hajdeni po ua mbajti. Ata kanë më shumë informata, unë po them se informatat janë të sakta, planet janë të detajuara, qëllimi i tyre është me destabilzu” deklaroi Haliti.
Sipas Halitit, këto grupe janë të përgatitura nga forcat speciale serbe dhe janë të përgatitura për luftë psiqike, terror e përdorim të armëve.
“Nuk ka familje serbe në veri që nuk janë furnizuar me mollotov”, deklaroi ai në RTK.
Megjithatë, sipas Xhavit Halitit rreziku që Serbia të futet në Kosovë me forca, apo që Rusia të sulmojë Kosovën është i pamundur.
