Sot Prokuroria Speciale ka kryer një operacion të madh. Në pranga ka vënë shtatë persona.
Ata u ndaluan për 48 orë me dyshimin se janë përfshirë në kryerjen e veprave penale, ‘’Hyrje në sistemet kompjuterike’’, ‘’Mashtrimi’’ dhe ‘’Shpëlarje e parave’’.
Gazeta ka folur me avokatën e njërit nga të dyshuarit. Ajo thotë se është i pafajshëm. “Ende është shumë herët të flasim per dyshimet e prokurorisë, me aq sa kemi informata deri me tani, klienti im është i pafajshëm” tha avokatja Majlinda Sadikaj Xhemnica, që përfaqëson të pandehurin K.S.
Lexo të plotë njoftimin e Prokurorisë:
NDALOHEN SHTATË PERSONA PËR HYRJE NË SISTEMET KOMPJUTERIKE, MASHTRIM DHE SHPËLARJE TË PARASË
Prishtinë, 21 shkurt 2024 – Me urdhër të Prokurorisë Speciale (PS), Policia e Kosovës ka ndërmarr një aksion në shtatë lokacione të ndryshme të Kosovës, ku janë arrestuar shtatë (7) persona të dyshuar për vepra të ndryshme penale.
Prokuroria Speciale dhe Policia e Kosovës, njoftojnë opinionin se gjatë këtij aksioni janë sekuestruar disa vetura, armë, municion, mjete të konsiderueshme materiale, si dhe prova të tjera materiale të cilat dyshohen se janë përdorur për kryerjen e veprave penale. Aksioni është zhvilluar në shtatë (7) lokacione të ndryshme me dyshimin se personat e ndaluar janë përfshirë në kryerjen e veprave penale, ‘’Hyrje në sistemet kompjuterike’’, ‘’Mashtrimi’’ dhe ‘’Shpëlarje e parave’’.
