Nga data 1 mars 2023, Fondi i Kursimeve Pensionale të Kosovës do të jetë jofunksional, pasi iu skadon mandati gjithë anëtarëve të Bordit.
Pesë nga shtatë anëtarëve të këtij Bordi, u kishte skaduar mandati më 30 nëntor të vitit të kaluar derisa më 1 mars u skadon edhe ai i vazhdimit të drejtpërdrejt prej 90 ditëve, sipas ligjit në fuqi.
Ndërkohë, dy anëtarëve tjerë u ishte skaduar mandati në shkurt 2021 dhe të njëjtin muaj të vitit 2022, e të cilët nuk ishin zëvendësuar asnjëherë.
Gjendjen për “teve1”, e ka konfirmuar edhe zëdhënësi i këtij institucioni, Jeton Demi.
“Pesë anëtarëve të Bordit Drejtues, aktualisht në detyrë (katër anëtarë profesionalë dhe një anëtar përfaqësues), iu ka përfunduar mandati i rregullt më 30 nëntor 2022; por meqë askush nuk është emëruar nga Kuvendi i Kosovës deri në atë datë, mandati i këtyre pesë anëtarëve vazhdon automatikisht (sipas legjislacionit në fuqi) edhe për 90 ditë kalendarike. Si rrjedhim, mandati i këtyre pesë anëtarëve skadon përfundimisht më 28 shkurt 2023 dhe pas kësaj date (prej 1 marsit 2023) FKPK-ja nuk do të ketë Bord Drejtues funksional. Përveç këtyre pesëve, dy anëtarëve të tjerë u kishte skaduar mandati më parë (shkurt 2021 dhe shkurt 2022) dhe nuk ishin zëvendësuar”, tha Demi për teve1
Sipas tij, me skadimin e mandatit edhe të pesë anëtarëve, nga data 1 mars 2023, Fondi i Kursimeve Pensionale të Kosovës nuk do të ketë mundësi të marr asnjë vendim sa i përket investimit të mjeteve pensionale për investim, tërheqje ose lëvizjen e mjeteve pensionale.
“Me skadimin e mandatit të të gjithë anëtarëve të Bordit Drejtues, prej datës 1 mars 2023 FKPK-ja do ta ketë të pamundur të ndërmarrë çfarëdo vendimi rreth investimit të mjeteve pensionale për investimin, tërheqjen ose lëvizjen e mjeteve pensionale meqë është përgjegjësi ekskluzive ligjore e Bordit Drejtues. Kjo mungesë është shumë serioze për institucionin, e ndërlidhur drejtpërdrejt me përgjegjësinë e Bordit Drejtues të FKPK-së ndaj sigurisë së mjeteve pensionale. Andaj, FKPK-ja ka nevojë emergjente ta ketë Bordin Drejtues funksional”, ka thënë ndër të tjera Demi.
Zëdhënësi i Trustit Jeton Demi po ashtu ka shtuar se për të shtatë pozitat e Bordit Drejtues, sipas kërkesës së Komisionit Përzgjedhës, është hapur konkurs më 2 dhjetor 2022 deri më 23 dhjetor 2022.
Mirëpo sipas tij, pas përfundimit të konkursit, lista e kandidatëve dhe dokumentacioni përcjellës i është dorëzuar Komisionit Përzgjedhës, për të cilën ky institucion nuk ka më përgjegjësi e as të drejtë ndërhyrje dhe se procedurat tjera varen vetëm nga Kuvendi i Kosovës.
Lidhur me procesin e përzgjedhjes së anëtarëve të Bordit të Trustit, teve1 ka pyetur zyrën e informimit të Kuvendit të Kosovës, prej të cilës nuk ka pranuar ende përgjigje e për të cilën do t’u mbaj të informuar.
Megjithatë, në ueb-faqen e Kuvendit, zgjedhja e anëtarëve të Bordit të Trustit nuk gjendet në asnjërin nga konkurset e fundit.
Bordi Drejtues i Fondit të Kursimeve Pensionale të Kosovës (FKPK) përbëhet prej shtatë anëtarëve, të cilët përzgjidhen përmes konkursit të hapur publik dhe emërohen nga Kuvendi i Republikës së Kosovës.
Mandati i tyre është katërvjeçar me mundësi rizgjedhjeje.
