Muajin e kaluar në njërën nga ngjarjet e saj kryesore, Samsung zbuloi tabletin e ri Galaxy S, i cili fillimisht ishte në dispozicion për para-porosi në Korenë e Jugut, ndërsa më vonë u mundësua edhe për tregjet tjera, jashtë vendit të origjinës së Samsung.
Samsung Galaxy Tab S ishte lansuar në SHBA më 27 qershor, ndërsa tani është në dispozicion për shitje edhe në Evropë. Samsung e ka konfirmuar se Galaxy Tab S 8.4 dhe Galaxy Tab S 10.5 tani janë në dispozicion në shitje në kontinentin evropian.
Samsung Galaxy Tab S vjen me ekranin Super AMOLED në dy opsione: njëri përmban ekranin prej 8.4” ndërsa tjetri vjen me ekranin prej 10.5”. Të dy modelet ofrojnë rezolucionin prej 2560 x 1600 pikselëve.
Tabletët e rinj të Samsung mbështeten nga procesorët Exynos 5 Octa (1.9 GHz QuadCore ＋ 1.3 GHz Quadcore) ose Qualcomm Snapdragon 800 2.3 GHz Quadcore, dhe disponueshmërinë e procesorëve e ndryshojnë sipas rajonit.
Të dy modelet e tabletëve të rinj të Samsung, përkatësisht Galaxy Tab S 8.4 dhe 10.5 sjellin 3GB RAM, 16GB memorie të brendshme dhe portin për kartelën mikroSD, e cila mund ta zgjerojë hapësirën e brendshme deri në 128GB, bashkë me Android 4.4.2 KitKat, si sistemin e tyre operativ.
Megjithatë, këto nuk janë karakteristikat e vetme të këtyre tabletëve, sepse secili version sjell bateri të fuqishme, dy kamera, lidhje për rrjete të ndryshme, dhe shumë specifika tjera të cilat duhet të vlerësohen nga secili blerës potencial.
