Federata Shqiptare e Kikboksit do të zhvillojë kampionatin e parë kombëtar të këtij sporti, këtë të diel, më 6 prill në Tiranë. Presidenti i FSHK-së, Xhavit Bajrami, thekson se në kampionat do të marrin pjesë 20 shoqata me mbi 70 sportistë.
Turneu kombëtar është planifikuar për të dielën e 6 prillit, në orën 10:00, në sallën sportive ”Fahrie Hoti” në Tiranë dhe ai do të ketë vlerë jo vetëm për të shpallur kampionët, por edhe për të bërë përzgjedhjen e fundit të sportistëve më të mirë që pritet të përfaqësojnë Shqipërinë në kampionatin botëror amator të këtij sporti, që fillon në Spanjë në fund të prillit.
