Oscar Pistorius po kërkon lirimin me kusht nga burgu. Ish-medalisti i artë në Paralimpikë do shkojë në gjykatë për të detyruar autoritet e Afrikës së Jugut për të zhvilluar një seancë gjyqësore për të dalë nga qelitë.
Ai po vuan një dënim me 13 vite burg për vrasjen e të dashurës së tij në vitin 2013. Pistorius vrau me armë zjarri partneren e tij Reeva Steenkamp brenda tualetit të banesës, duke pretenduar se e ngatërroi me një hajdut.
Pistorius po kërkon një lirim të parakohshëm për një mosmarrëveshje rreth fillimit të dënimit të tij. Një sërë sfidash dhe vendimesh nga Gjykata e Lartë e Apelit (SCA) ka çuar në konfuzion rreth kohës kur dënimi i tij hyri në fuqi.
Sportisti argumenton se ka vuajtur mjaft kohë në burg për t’u kualifikuar për lirim me kusht, dhe për këtë arsye autoritetet duhet të shikojnë nëse ai mund të dalë nga qelitë.
Në vitin 2017, SCA tha se Pistorius duhet të vuante 13 vjet e pesë muaj për vrasjen e Steenkamp, duke përmbysur një dënim të mëparshëm, më të butë prej gjashtë vjetësh për vrasje.
Vitin e kaluar, e njëjta gjykatë vendosi që dënimi aktual duhet të kthehet në tetor 2014, kur ai u dënua fillimisht për një akuzë më të vogël.
Pistorius argumenton se kjo datë do të thotë se ai u kualifikua për lirim me kusht në shkurt të vitit të kaluar.
Ai dëshiron që Gjykata e Lartë e Gauteng të urdhërojë bordin e lirimit me kusht që të thërrasë një seancë për të. Nëse kjo kërkesë pranohet, ai dëshiron që seanca të jetë brenda 30 ditëve.
Por burgu i Atteridgeville, ku ai po mbahet, thotë se gjykata e apelit ka dhënë vendime kontradiktore.
Departamenti i Shërbimeve Korrektuese thotë gjithashtu se po kërkon një vendim gjykate për të përcaktuar datën kur filloi dënimi i tij.
Vrasja e Steenkamp në ditën e Shën Valentinit nëntë vjet më parë tronditi vendin.
Në gjyqin televiziv, i cili mbërtheu miliona në Afrikën e Jugut dhe në mbarë botën, u deklarua se Pistorius kishte qëlluar katër herë të dashurën e tij sepse mendonte se një hajdut kishte hyrë në shtëpinë e tij në Pretoria.
Por një panel i gjykatësve të apelit tha se pasi ishte armatosur me një armë të kalibrit të lartë, Pistorius duhet të kishte parashikuar që kushdo që ishte pas derës së tualetit mund të vdiste, veçanërisht duke pasur parasysh stërvitjen e tij me armë zjarri.
Ngritja dhe rënia e Oscar Pistorius
Gusht 2012: Konkurron në Lojërat Olimpike dhe Paralimpike të Londrës, ku fitoi një medalje të artë
Shkurt 2013: Vret të dashurën e tij Reeva Steenkamp
Mars 2014: Fillon gjyqi
Shtator 2014: Gjykatësi shpall Pistorius
Tetor 2014: Fillon dënimi me pesë vjet
Tetor 2015: Transferohet në arrest shtëpie
Dhjetor 2015: Gjykata e Apelit ndryshon vendimin në vrasje
Korrik 2016: Dënohet me gjashtë vjet burg për vrasje
Nëntor 2017: Dënimi u dyfishua në 13 vjet e pesë muaj.
