Gjatë javës së kaluar dy prej aleatëve historik të demokratëve, Fatmir Mediu i PR-së dhe Dashamir Shehi i LZHK-së nuk i kursyen kritikat kundrejt Lulzim Bashës dhe mënyrë sesi ai po menaxhon ministrat e tij teknik në qeverinë e të majtëve.
Por nuk do të vononte reagimi nga selia blu i ardhur nga këshilltari i Bashës Edi Lesi, i cili do t’i kthente përgjigje akuzave të Mediut e Shehit, duke i cilësuar si ide pa përmbajtje të dala nga goja e personave që prej mëse 20 vitesh nuk zbresin nga karriget e kryetarëve të partive të tyre të vogla.
Pas kësaj situate të “nxehtë” që pason tensionet në zgjedhjet e korrikut në PD, zjarr benzinës i ka hedhur Astrit Patozi, njëri ndër kundërshtarët e Lulzim Bashës.
Pavarësisht se Patozi nuk merret me objektin e përplasjeve (Ministrat teknikë, duhet të ikin apo jo nga qeveria sa më parë) ai thumbon ashpër këshilltarin e Lulzim Bashës dhe vetë kryedemokratin. Ish deputeti demokrat shkruan se në PD tashmë është rregull që të gjithë duhet të mendojnë njëlloj, përndryshe ka pasoja dhe të hidhen në qafë.
Patozi i referohet këshilltarit të Bashës me shprehjen se një kopil mund të lihet në derë, por ka ca gjëra të tjera në botë që nuk mund të delegohen.
Ndërsa për Bashën, sarkazma e Patozit shkon më tutje, kur shprehet se para se të mbarojë pushimet, kryedemokrati duhet të sjellë disa kostume të kohës së Revolucionit Kulturor Kinez të vitete 60’, në mënyrë që jo vetëm të gjithë demokratët dhe aletatët të mendojnë njësoj, por edhe të vishen njëlloj, raporton Express.
Më poshtë postimi i Astrit Patozit
QË TË MOS PRISHET HARMONIA E KASOLLES
Tani që mendoni se i keni larë hesapet me armikun e shtëpisë, dilni një herë shikoni edhe nga baçet e komshinjve. Se nuk mjaftojnë 230 mijë ushtarë, që munguan në apelin e 25 qershorit, por mbase ju duhen dëshmorë të tjerë, që duhet të bien ndoshta pak me vonesë për kauzën e madhe të "çadrës së lirisë".
Le ta mësojnë edhe aleatët se çfarë i gjen nëse e prishin unitetin e çelniktë të asaj që ka mbetur nga Partia Demokratike. Që të mos guxojnë më të cënojnë atmosferën festive, që ka përfshirë të madh e të vogël në Shqipëri, sidomos pas fitores plebishitare të 22 korrikut.
Ndajini edhe ata pak aleatë, që na kanë mbetur, në të mirë dhe të këqinj, në djaj apo ëngjëj, në ata që duhen dhe në të tjerë që nuk duhen, se nuk mjaftoka që edhe bashkë me ta jemi sot në parlament 14 mandate më pak se 4 vjet të shkuara. Tek e fundit, ata duhet të qartësohen një herë e përgjithmonë se tek kasollja jonë, që sa vjen e zvogëlohet, ka vend vetëm për ata që mendojnë njësoj.
Të tjerët, që mund të kenë kokën e tyre, le të gjejnë strehë ku të duan. Janë të lirë të shkojnë në shtëpi të tjera, në vila apo grataçelë, po të duan, mjafton që të mos e prishin rregullin harmonik dhe harmoninë e rregullt të kasolles.
Dhe pasi të keni mbaruar punë me të gjithë, futjuni edhe një herë qilizmës brenda gardhit të partisë sonë, se mbase ju ka tepruar ndonjë armik, të cilin mund të mos e ketë kapur tamam vala e parë e luftës së klasave. Nga ulja e vigjilencës apo nga fshehja e kokës së gjarprit, kjo pak rëndësi ka.
Le të kthehet kjo në një zakon të përhershëm apo në një ligj të pashkruar, njësoj siç ka mbetur që në çdo 4 vjet, më 22 korrik, Partia Demokratike ka pasur, ka dhe do të ketë votime për të zgjedhur Lulzim Bashën kryetar.
Nuk jua kam fare merakun që këtë mision do ta kryeni me sukses, sepse të tillë e keni edhe porosinë, edhe zellin. Por një këshillë e kam edhe për ju: Bëjini një zë udhëheqësit që të kthehet në atdhe, megjithëse është kohë pushimesh, sepse ka ca gjëra në botë që nuk delegohen dot. Fjala vjen, mund t'ia lësh dikujt kopilin në derë, por për ta bërë atë, nuk ia lë dot dikujt tjetër. Sepse nuk mjafton të jetë vetëm kopil, por duhet të jetë edhe i yti.
Mbase i bën mirë kthimi dhe e kthjellon për të dalluar më mirë se cilat janë punët që i takojnë të bëjë opozitës, edhe sikur populli bashkë me qeverinë të shkojë i gjithi me pushime. Mbase e frymëzon puna dhe vepra juaj dhe e shtyn edhe më tej pastrimin e oborrit tonë dhe kopshteve të fqinjëve nga barërat e këqija.
Por që të jeni brenda, në rast se ka këtë mendje, i thoni që të sjellë me vete edhe një tufë me kostume doku, nga ato që vishnin kinezët në vitet e Revolucionit Kulturor, që jo vetëm të mendoni njësoj, por edhe të mbatheni gjithashtu njësoj. Me të njëjtën uniformë si lideri suprem dhe i pagabueshëm.
