Pesë mijë banorë që jetojnë në pjesën fundore të ish Fushës së Aviacionit do të kenë shumë shpejt në dispozicion infrastrukturë moderne.
Bashkia e Tiranës po përfundon zbatimin e projektit të rikualifikimit urban të bllokut të banesave që kufizohet me Rr. Dritan Hoxha, Rr. Teodor Keko, Rr. Anesti Lubonja dhe Parkun tek Ish Pista e Aviacionit. Punimet për rikualifikimin e infrastrukturës në këtë bllok u inspektuan nga kryetari i Bashkisë së Tiranës, Erion Veliaj, i cili u shpreh i kënaqur me ecurinë e tyre.
“Janë 18 rrugë, të cilat do ta ndryshojnë ndjeshëm nivelin dhe cilësinë e jetës urbane në njësinë 7. Ishte e paimagjinueshme që e gjithë kjo zonë në afërsi të doganës, pra hyrja në kryeqytetin e shqiptarëve, i ngjante në fakt një zone totalisht primitive dhe të degraduar nga ana e urbanistikës. Kemi qenë këtu edhe gjatë fushatës, ndaj na jep kënaqësi që 2 javë para se të mbushet viti nga marrja e detyrës, kemi zhbllokuar një projekt që zvarritej pafundësisht. Sot jemi në një fazë ku, një pjesë e madhe e punimeve kanë mbaruar. Besoj se para afatit 10-mujor të punimeve, pra në krye të 5 muajve, do të kemi mbaruar urbanizimin e zonës”, deklaroi Veliaj.
Kryebashkiaku i Tiranës theksoi se pas urbanizimit, në këtë zonë do të vendoset edhe linja e re e autobusëve për stacionet e të cilëve është i mirëpritur edhe kontributi i qytetarëve. “Pas urbanizimit të zonës në këto 18 rrugë, do të fillojë edhe linja e re autobusëve, që të sigurohemi që jo vetëm asfaltojmë, por edhe shtojmë transportin për të lidhur qytetarët me njëri-tjetrin, po ashtu edhe lagjet e Tiranës me pjesët e tjera të qytetit”, tha ai. Një tjetër projekt që prek njësinë 7 është dhe nisma e bashkisë për ndërtimin e 20 shkollave të reja në të gjithë Tiranën. Ndërkohë, Veliaj kërkoi bashkëpunimin e qytetarëve për të krijuar hapësirat e nevojshme publike brenda zonave të banuara.
“U bëj thirrje qytetarëve që të bashkëpunojnë me Bashkinë e Tiranës, me kompanitë zbatuese, për të tërhequr avllitë dhe muret e tyre. Tërheqja e murit vërtet liron 1 metër trotuar, por i shton shumë herë më shumë vlerën asaj shtëpie dhe lagjes”, tha Veliaj. Ai vlerësoi vendimin e qeverisë për të legalizuar ndërtimet pa leje, por theksoi se edhe qytetarët duhet të përgjigjen me të njëjtën bujari. “Shumë mirë që kjo qeveri i ka legalizuar ndërtesat pa leje, por tani është e rëndësishme që me të njëjtën monedhë, qytetarët që sapo kanë legalizuar ndërtesat e tyre, t’i përgjigjen bujarisht qytetit duke lejuar që të kemi së paku 1-2 metër trotuare në funksion të hapësirës së përbashkët. Kështu, përfitojmë të gjithë, sidomos ata që për hir të trotuarit u del prona në pah dhe kanë një hapësirë më të këndshme përpara shtëpisë së tyre”, u shpreh ai.
Kryebashkiaku Veliaj theksoi se Bashkia e Tiranës do të vazhdojë punën gjatë gjithë verës me projektet e saj, në mënyrë që kur qytetarët të kthehen nga pushimet të gjejnë institucione dhe ambiente më të mira. “Dua t’i falenderoj qytetarët për durimin dhe i garantoj që kur të kthehen nga pushimet, në fund të gushtit dhe në fillim të shtatorit, jo vetëm që do të gjejnë të gjithë institucionet sociale dhe arsimore gati për fillimin e vitit të ri shkollor, por do të gjejnë edhe një pjesë të rëndësishme të Tiranës nën një administrim të ri të kompanisë publike të pastrimit; një Tiranë më të pastër, me më shumë sinjalistikë dhe më shumë investime”, deklaroi ai.
