Kryeparlamentari Ilir Meta ka goditur sërish me një deklaratë me spond për kryeministrin Edi Rama. Teksa edhe opozita e akuzoi dje Ramën se qante hallin e ndeshjes që nuk do shihej në sheshin para godinës së Kryeministrisë, për shkak të përmbytjeve dhe nuk tha asnjë fjalë për situatën e familjeve të prekura nga ky fenomen natyror, edhe Meta sot para mediave ka dhënë një përgjigje për shefin e qeverisë.
I pyetur nga mediat për situatën e përmbytjeve dhe çfarë po bën qeveria për këtë gjë, Meta tha:
“Pritet që të ketë mot të vështirë dhe shpresoj që gëzimi i këtij kualifikimi të merituar të mos çojë në zbehjen e vëmendjes nga problemi real dhe shqetësues në jug të vendit dhe kudo tjetër ku situata mund të vështirësohet”,- tha Meta.
DJE/***I gjithë problemi i kryeministrit duket se ka qenë që shiu ka anuluar aktivitetin që bëhet në çdo ndeshje të kombëtares tek Kryeministria. Kuqezinjve Rama i ka uruar bereqet.
“Per shkak te shiut te rrembyeshem i pamundur organizimi i sotem ne Parkun e Kryeministrise:-( Qofte bereqet per Kuqezinjte:-)#ForcaShqiperia”.
Më parë, dje, ishte kreu i opozitës Lulzim Basha ai që në një deklaratë për mediat i bëri thirrje qeverisë të mobilizohet për situatën që ka mbërthyer vendin. Por Rama replikoi duke thënë se opozita “bën politikë me shiun”.
