Aksionit qytetar për pastrimin e Tiranës, të thirrur nga Bashkia e kryeqytetit, i janë bashkuar mes të tjerash edhe 8 gra të dënuara nga IEVP “Ali Demi” dhe punonjës të Drejtorisë së Policisë së Shtetit.
Të dënuarat e shoqëruara nga forcat e sigurisë, kanë kontribuar në pastrimin e njësisë bashkiake nr.1 në zonën Ali Demi, ndërsa janë pajisur me veshje identifikuese dhe mjete për pastrimin.
Të burgosurave pjesëmarrëse në aksion u kishte mbetur edhe shumë pak muaj dënim për të kryer dhe kanë shprehur vullnetin e tyre të lirë për të marrë pjesë në këtë nismë qytetare.
Kjo është e disata herë që Drejtoria e Përgjithshme e Burgjeve angazhon personat e dënuar dhe stafin e burgjeve në aksione qytetare të përbashkëta të kësaj natyre. Nisma të tilla nxisin përfshirjen në komunitet dhe motivimin e personave të privuar nga liria, që përbën synimin kryesor të sistemit të burgjeve në çdo vend.
Punonjësit e policisë nga ana e tjetër kanë dhënë kontributin e tyre në pastrimin vullnetar të territorit përreth ambienteve të Drejtorisë së Policisë së Shtetit.
