Në programin “Gëzuar me ju” ishin të ftuar këngëtarët e njohur të muzikës popullore Perlat Sheqeri, me origjinë nga Puka, dhe Arif Dushaj, nga Tropoja.
Së bashku me ta në program ishin të ftuar edhe Gjovalin Dushaj, bashkëpunëtor i ngushtë ndër vite, tekstshkrues e regjisor, Munir Hoxha poet dhe muzikolog, mbesa dhe nipi i Arif Dushaj, Sentila dhe Sindrit Kërnaja, të cilët folën për marrëdhënien e ngushtë që kanë me dajën e tyre.
Ata u shprehën krenarë për dajën e tyre dhe muzikën e tij. “Është artist në shpirt dhe në profesionin që bën. Është fat kush e ka afër.
Ne jemi rritur me këngët e dajës, është talent i vërtetë”, tha mbesa e Arifit.
Këngë shumë të bukura popullore u kënduan në “Gëzuar me ju”, ku do të përmendim, duetin e Arifit dhe Perlatit “Thrret Prizreni mori Shkodër”, “Moj Shqipni mos thuj mbarova”, dhe gjithashtu nuk kishte si të mungonte “Vallja e Tropojës” me të cilën gjithë të pranishmit në studio u ngritën në valle.
Të ftuarit në studio folën ndër të tjera se si rapsodia është trashëguar brezë pas brezi, për historinë e muzikës së Veriut dhe se si ajo është një pjesë e pandarë e rrugëtimit të tyre.
