Deputetja e Partisë Demokratike, Jorida Tabaku ka komentuar vendimin për të shtyrë ligjin për investimet strategjike. Me anë të një postimi në rrjetet sociale, Tabaku thotë se “kapja e shtetit është investimi strategjik socialist”.
Sipas deputetes demokrate, ky është një nga projektligjet më klienteliste, ndërsa thekson se manovrat e qeverisë janë në kundërshtim me direktivat e BE.
“Shkurt e qartë, qeveria me këto dy propozime i jep shansin vetes që të hedhë beton strategjik në parqet tona kombëtare, në rezortet tona natyrore dhe ku ta shoh ajo të arsyeshme. Të gjitha këto manovra janë në kundërshtim me direktivat e Bashkimit Europian dhe progresraportin”, shkruan Tabaku.
Tabaku shprehet se “autorët e shtyrjeve të ligjeve që kanë si synim kapjen e shtetit dhe të ekonomisë, janë edhe paladinët që do të mbrojnë integrimin europian duke i kërkuar llogari institucioneve të pavarura”.
Reagimi i plotë i Jorida Tabakut:
Dy vite më parë një raport ndërkombëtar qartësoi për publikun se si qeveria shqiptare përdor kuvendin si noter për të miratuar ligje me porosi. Skema e cila përdorej e konsideronte parlamentin një hallkë të parëndësishme ku ngritja e kartonave ishte thjesht procedurë për t’u kaluar dhe gara mes deputetëve ishte kush ta mbronte më shumë qeverinë gjatë kapjes së shtetit.
Sot, skema është përmisuar pasi qeveria ka menduar që të keqpërdorë edhe më shumë deputetët dhe parlamentin. Ajo ka kohë që ka e ka shkatërruar procesin legjislativ ku ligje kleineliste firmosen nga deputetë. Dy shembuj të freskët, që kanë dhe lidhje me njëri tjetrin, është propozimi i pestë për të shtyrë Ligjin e Investimeve Strategjike dhe propozimi për Ligjin e Zonave të Mbrojtura. Të dy projektligje të propozuara nga mazhoranca socialiste që në dukje nuk kanë lidhje me njëra tjetrën por që në fakt janë shkak pasoja edhe hallka të zinxhirit të madh që kanë kapur shtetin.
Ligji Investimeve Strategjike është një nga projektligjet më klienteliste, antri-treg dhe në kundërshti me MSA që është miratuar nga Parlamenti. Propozimi për të shtyrë për herë të pestë këtë ligj (që është miratuar që në krye të herës me afat kohor) nuk do të përmisojë bilancin e investimeve të huaja në vend. Nga 80 kërkesat e dërguara në KIS dhe në 60 investimet e miratuara asnjë prej tyre nuk është strategjik dhe aq më pak investim i huaj serioz. Përkundrazi, përfituesit janë gjithnjë të dyshuarit e zakonshëm që përfitojnë përherë taksa të ulëta kurse shqiptarët paguajnë barrën e madhe të tyre. Me pak fjalë nuk ka asnjë arsye që i shërben shqiptarëve për të shtyrë këtë ligj në kohë. Atëherë ku fle lepuri në shtyrjen e këtij ligji?
Propozimi i deputetëve për Zonat e Mbrojtura nuk është një kërkesë e bashkive për më shumë autoritet dhe përfitime. Në të vërtetë propozimi i deputetëve socialistë është propozimi i qeverisë socialiste që kërkon të anashkalojë çdo procedurë konsultimi publik për të hequr të gjitha funksionet e kontrollit të territorit që kanë Agjencitë nën Ministrinë e Mjedisit për t’ia kaluar Kryeministrit. Ky i fundit, do të çlirohet edhe nga kategorizimi i zonave të mbrojtura dhe në këtë mënyrë me një të rënë të lapsit do të çlirohet nga përgjegjësitë kundraligjore për të ofruar Investime Strategjike të variantit rezorte në mesin e mrekullive natyrore që ka Shqipëria.
Shkurt e qartë, qeveria me këto dy propozime i jep shansin vetes që të hedhë beton strategjik në parqet tona kombëtare, në rezortet tona natyrore dhe ku ta shoh ajo të arsyeshme. Të gjitha këto manovra janë në kundërshtim me direktivat e Bashkimit Europian dhe progresraportin.
Të njëjtët deputetë socialistë, që ndërmarrin nisma të tilla në kundërshtim me integrimin Europian dhe që kodifikojnë me sjelljet e tyre kapjen e shtetit, janë ata që kanë marrë përsipër dhe misionin e “mbikqyrjes” së institucioneve të pavarura në emër të atyre parimeve që me vetëdije i kanë shkelur. Autorët e shtyrjeve të ligjeve që kanë si synim kapjen e shtetit dhe të ekonomisë, janë edhe paladinët që do të mbrojnë integrimin europian duke i kërkuar llogari institucioneve të pavarura.
Ka veç një të vërtetë që në fakt është përforcuar qartë për këdo; investimi tyre strategjik është kapja e shtetit!
