Vazhdon gjyqi ndaj Fredi Belerit, në të cilin dy prokurorët e SPAK po lexojnë 18 faqe prova shkresore.
Gjatë seancës së radhës në procesin ndaj Belerit, SPAK i tha gjykatës se nga ekspertimi i telefonit të bashkëpandehurit tjetër Pandeli Kokaveshi është zbuluar një grup në aplikacionin WhatsApp i quajtur “Himara ime je ti”.
Në këtë grup sipas Prokurorisë, ka biseda rreth ndihmesës që do t’i ofroheshin qytetarëve të Himarës dhe zona përreth, ndër to edhe për sigurimin e “letrave greke”. Madje në një bisedë, Beleri i ka tërhequr vëmendjen Kokaveshit me fjalët: Çfarë janë këto biseda, nga këto do të digjesh ti!
Por avokatët e Belerit i kundërshtuan leximet e SPAK-ut, dhe sipas tyre nuk kanë lidhje me objektin e gjykimit dhe bisedat janë kryer më herët se sa të kryhej vepra penale, madje telefoni ka qenë në pronësi të nënës se Pandeli Kokaveshit – pretendoi mbrojtja. Gjyqi po vazhdon, raporton Top Channel.
Kryetari i Bashkisë së Himarës, Fredi Beleri, u arrestua për blerje votash më 12 maj, dy ditë para zgjedhjeve bashkiake. Sipas autoriteteve, Beleri u arrestua në bazë të përgjimeve që zbuluan se një person i tretë do t'i jepte një listë me emrat e atyre që do ta votonin nëse do t'i paguante 45 euro.
Gjithashtu, dyshohet se Beleri i ka premtuar ndërmjetësuesit rreth 300 euro, por që të gjitha transaksionet janë bërë nëpërmjet një ndërmjetësi dhe jo me vetë Belerin.
Beleri mohon të gjitha akuzat ndaj tij dhe thotë se arrestimi i tij është një organizim i motivuar politikisht, një qëndrim i mbështetur nga Athina.
Kryeministri grek Kyriakos Mitsotakis dhe ministri i Jashtëm Nikos Dendias dënuan arrestimin dhe thanë se nëse Beleri nuk lirohet, ata potencialisht do të bllokonin rrugën e anëtarësimit të Shqipërisë në BE.
Çështja iu raportua edhe presidentes së Komisionit Evropian Ursula von der Leyen.
Kryeministri Edi Rama dhe ministrja e Jashtme Olta Xhaçka kanë thënë se çështja nuk është e motivuar politikisht dhe se është e domosdoshme që strukturat e drejtësisë të lejohen të vazhdojnë punën e tyre pa presion dhe ndërhyrje.
Mosmarrëveshja e fundit ndodh në kuadrin e marrëdhënieve të vakëta mes dy vendeve. Në maj 2022, Dendias kërcënoi se do të tërhiqte mbështetjen për anëtarësimin e Shqipërisë në BE nëse ajo ndiqte çështjen e Çamërisë.
Deri në 30,000 çamë u larguan me forcë nga rajoni në Greqinë veriore midis viteve 1913 dhe 1944, me qindra të masakruar dhe 2,400 të vdekur rrugës për në Shqipëri. Çamët kërkojnë falje për atë që ata e cilësojnë si gjenocid, ndërsa janë raportuar incidente të çamëve që iu refuzohet hyrja në Greqi.
Për më tepër, çështja e përcaktimit të shelfit kontinental dhe kufijve detarë mbetet e pazgjidhur dhe është dërguar në një gjykatë ndërkombëtare, me thashethemet që qarkullojnë se Athina bëri kërcënime të ngjashme lidhur me pranimin në BE.
Komisioni, megjithatë, nuk komentoi kërcënimet e Athinës për të bllokuar në mënyrë të njëanshme ofertën e Shqipërisë për anëtarësim në bllok.
