Gazetarja e Top Channel, Anila Hoxha, zbardh dëshmitë nga seanca me dyer të mbyllura për çështjen Beleri.
Shefi i komisariatit të Himarës Ermal Ajdini u shpreh se nga Arsen Rama u njoftoi se Fredi Beleri po blinte vota për të fituar në zgjedhjet lokale. Por, arrestimi, sipas tij, nuk u bë menjëherë pasi “kishim dyshime se kishte persona të tjerë të përfshirë”.
Ermal Ajdini: Isha shef në komisariatin e Himarës. Arsen Ramën e kam njohur se kam punuar aty. Në fund të majit ose prillit 2023 më bëri me dije në telefon se Fredi Beleri i ka thënë për të blerë vota. Kam bërë verifikime dhe më tha pas një jave çfarë të bëj me përgjimin dhe kam bërë verifikime prapë dhe konstatova se informacioni qëndronte. Njoftova eprorët dhe bëra regjistrimin e çështjes në prokurori. Pas kësaj, ai pranoi bashkëpunimin me drejtësinë, kam autorizuar përgjimin. Arsen Rama vishej sportiv dhe pas arrestimit të Belerit, ai pati kërcënime dhe u largua drejt Vlorës.
Provat i kam dërguar me postë. I kam pasur kontaktet dhe vëzhgimin me forcat operacionale. Kishim informacion se disa persona në fshatin Vuno do të pajiseshin me dokumente. Arsenin e kam shoqëruar unë në prokurori për të dhënë dëshminë e parë. U binda nga faktet dhe kisha informacion për shkëmbimin e lekëve me Kokaveshin. Nuk u arrestuan direkt pasi kishim dyshime se mund të kishte të implikuar të tjerë.
Ne e arrestuam Belerin, pasi ai i dha lekët Kokaveshit. Ne kemi sekuestruar dy lista dhe njëra është dorëzuar pas dhënies së lekëve nga Kokaveshi.
Në listën e dëshmitarëve ishte edhe Gligor Mëkuri, që u shpreh në gjykatë se puna e tij është të mbledhë kanoçe dhe as e kishte idenë se emri i tij ishte në listë.
Gligor Mërkuri: Unë mbledh kanoçe, nuk e dija që e kisha emrin në listë. Më thanë që të votoja për Belerin do më jepnin 100 mijë lekë. Ndërsa për gruan dhe mamanë edhe njëqind të tjera. Lekët do m’i jepte Niko Panajoti që e kam të afërt të nënës. Ne nuk i morëm lekët sepse nuk votuam.
