Katër punonjës policie janë pezulluar nga detyra në Velipojë me argumentin se nuk kanë përmbushur detyrën pasi mbi 10 mijë bimë narkotike kanabis u gjetën të kultivuara në një fshat.
U pezulluan: shefi i stacionit të policisë Velipojë, njëkohësisht përgjegjës për monitorimin e zonës; një specialist për hetimin e krimeve në zonën ku u gjetën bimët narkotike; një specialist i njësisë “Shqiponja”, përgjegjës i zonës për kontrollin e territorit nga DVP Shkodër; dhe ndihmësspecialist (SPZ) në zonën ku u gjetën bimët narkotike.
Si rezultat, janë gjetur të kultivuara 10 920 bimë të dyshuara narkotike cannabis sativa. Një pjesë e tyre janë sekuestruar në cilësinë e provës materiale, ndërsa pjesa tjetër është asgjësuar nëpërmjet djegies.
Strukturat e Drejtorisë Vendore të Policisë Shkodër, në drejtimin e Prokurorisë, kanë bërë të mundur identifikimin e autorëve të dyshuar të kultivimit të bimëve narkotike, dhe po punohet për dokumentimin me prova ligjore të veprimtarisë kriminale të tyre.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme, për veprën penale “Kultivimi i bimëve narkotike”.
Ndërkohë, Drejtoria e Standardeve Profesionale në Drejtorinë e Përgjithshme të Policisë së Shtetit vijon hetimin e thelluar administrativ, për nxjerrjen e përgjegjësive lidhur më këtë rast.
