Një dëshmi ka ardhur për vrasjen në Tiranë të nënës së dy fëmijëve Migena Sinani nga vëllai i bashkëshortit Roland Sinani, i cili më pas vrau veten.
Gazetarja Klodiana Lala ka zbardhur dëshminë e një kamerieri që punon në një lokal pranë banesës së familjes Sinani ka thënë se e ka parë 43-vjeçarin në oborr me armë në dorë.
“Një moment më drejtoi mua armën dhe u ndjeva i frikësuar”, ka thënë ai.
Policia ka shoqëruar pas krimit prindërit e autorit të dyshuar, të cilët kanë dhënë dëshminë e tyre gjithashtu.
Mësohet se vjehrra e viktimës është me probleme të shumta shëndetësore dhe hekura në të dyja këmbët. Ajo ka thënë se ka shkuar me vështirësi deri në dhomën e nuses pas ngjarjes, ku ka parë çfarë kishte ndodhur.
Ndërsa bashkëshorti i 37-vjeçares punonte si taksist gjatë natës dhe nuk ishte në shtëpi kur ndodhi krimi. Ai kishte qenë për shumë kohë i papunë dhe së fundmi kishte nisur të punonte.
Sipas fqinjëve, autori i dyshuar Roland Sinani kishte qenë shumë i tërhequr dhe frekuentonte një nga lokalet në zonë, por nuk ishte i alkoolizuar. 43-vjeçari punonte në një gomisteri në “Ali Demi”. Kohët e fundit kishte shfaqur shenja të shumta të depresionit dhe kishte kërcënuar kunatën, por nuk ka pasur denoncime ndaj tij.
37-vjeçarja që u vra ishte nga Lundra dhe djali i madh, 4 vjeç ishte te prindërit e saj, ndërsa në dhomë kur ndodhi ngjarja kishte vajzën 2 vjeçe në shtrat. Policia ndodhet ende në banesën e familjes Sinani për veprimet hetimore dhe mbledhjen e të gjitha dëshmive. Sipas policisë, arma që përdori autori dyshohet të ketë qenë pa leje.
