Vazhdimi i një serie ngjarjesh të pazbardhura dyshohet të jetë atentati i dështuar ndaj 31-vjeçarit Marklen Haka, ndaj të cilit u qëllua 17 herë me një pistoletë glok teksa ai ishte duke udhëtuar me një mjet “Golf” si pasagjer.
Ngjarja ndodhi në hyrje të Niklës rreth orës 14:00 të së mërkurës. Si pasojë e të shtënave, Haka mbeti i plagosur në fytyrë.
Autorët i kishin ngritur pritë Hakës duke u pozicionuar buzë rruge për ta qëlluar sapo ai të kthehej në fshat. Largimi me shpejtësi sapo nisi sulmi me armë dyshohet se i shpëtoi jetën 31-vjeçarit.
Pas atentatit të parë ndaj Hakës, në shtator të vitit 2019, ku ai u plagos dhe halla e tij ndërroi jetë, ngjarje kjo ende pa autor, në Nikël u prishën ekuilibrat ku dyshimet binin edhe mbi miqtë e dikurshëm.
Gati një vit më vonë, në nëntor të vitit 2020 në Tapizë ndodhi një tjetër atentat i dështuar ku objektiv ishte Durim Bami, një tjetër emër i botës së krimit në këtë zonë. Nga të shtënat Bami nuk u lëndua por kushëriri i tij u plagos në dorë. Kjo ngjarje nuk u zbardh nga policia dhe mes të dyshuarve ishte dhe Marklen Haka, mik i dikurshëm i Bamit.
Një tjetër pistë hetimi është edhe hakmarrja për shkak të disa ngjarjeve të rënda kriminale ku Haka dyshohet si autor por që drejtësia nuk ka mundur dot tja provojë.
