Opozita denoncoi një rast të tjetërsimit të dokumenteve të pronësisë me qëllim grabitjen e pronave në bregdetin e jugut.
Deputeti demokrat Arbi Agalliu bëri publike aktin e pronësisë për një siperfaqe toke në Jalë ku pasardhësve të shtetasit Lilo Mëhilli i janë dhënë 9.100 metra katrorë tokë, më shumë sesa parashikon ligji për ndarjen e tokave bujqësore.
“Por nga ana tjetër sipas ligjeve në fuqi norma për frymë në ndarjen e tokës bujqësore që përfitohet nga ligji 7 .501 në Bashkinë Himarë në fshatin Vuno është jo me shumë 3500 metra katrorë për frymë. Në certifikatë familjare të marrjes së pronësisë në 1991 kemi pasur Lilo Mëhillin. Pse pasardhësve të këtij individi i janë dhënë më mbi 6000 metra katrorë tokë më shumë nga çfarë i takon sipas ligjit”.
Demokrati bëri publike edhe përgjigjen e Kadastrës për këtë rast.
“Agjencia shteterore e kadastrës kthen përgjigje zyrtare se verifikimi I sasisë së tokës së përfituar ne raport me normen për frymë, dhe menyren e shperndarjes nuk bëjnë pjesë në përgjegjësine e ketij institucioni. pyetja ime pse iu kanë dhene pasardhësve mbi 6 mije metra katrorë tokë më shumë sesa i takon nga ligji, në një zonë që lakmohet.”
Deputeti demokrat i qarkut te Vlorës i bëri thirrje institucioneve përkatëse të marrin masa për këtë rast flagrant. Pronarët e tokës po presin ende zbardhjen e vendimit të gjykatës së Vlorës në mënyrë që të bëjnë apelim.
