Ashtu si në rastin e ish-ministrit të Mjedisit Lefter Koka, i cili dyshohet se mori ryshfetin për favorizimin e kompanisë së Klodian Zotos nëpërmjet pagesave të kompanive fiktive për punë që nuk u kryen asnjëherë, njësoj ka funksionuar edhe me deputetin Alqi Bllako.
Prokuroria e Posaçme duke llogaritur pagat e babait të deputetit si drejtor kantieri i kompanisë së Klodian Zotos, Integrated “Energy BV SPV” prej 6 mijë eurosh në muaj, nga viti 2018 deri në 2020, thotë se ky është ryshfeti për favorizimin e kompanisë bërë nga Bllako dhe kap një vlerë totale rreth 15 milionë lekësh.
SPAK ka marrë dëshmi të punonjësve të kompanisë nëse babai i deputetit ishte paraqitur ndonjëherë në punë. Ata kanë deklaruar se e kanë parë vetëm 2 apo 3 herë.
Por, para këtij momenti, SPAK thotë se Bllako në bashkëpunim me ish-ministrin Lefter Koka dhe Pëllumb Abeshin i kanë dorëzuar Këshillit të Ministrave dokumente të falsifikuara për llojin e tokës ku do ndërtohej inceneratori.
Abeshi i cili ishte edhe në rolin e drejtuesit të Komisionit për Koncensionin ka vepruar në rastin e shpronësimit pa vënë në dijeni anëtarët e tjerë që ishin zyrtarë të Ministrisë së Mjedisit, Energjisë dhe Bashkisë së Fierit, të cilët gjithsesi ranë në prangat e SPAK për shkak të lidhjes së kontratës në kundërshtim me parashikimet ligjore.
