Aktivisti Donald Martini, i cili u shoqërua mbrëmjen e djeshme në komisariat nga policia për shkak se ka dalë në protestë, ka rrëfyer dhunën që sipas tij ka ushtruar policia.
Në një intervistë për ABC, Martini i cili ishte sot në protestën para ministrisë së Brendshme thotë se është shoqëruar dhunshëm nga efektivët e policisë, ndërsa pohon se në ambientet e komisariatit është goditur.
“Nuk arrij ta kuptoj arsyen pse duhet të sillet një njeri deri në atë pikë. Nuk e kundërshtim për asgjë dhe ai të gjuan me shkelm. Ma do mendja se kemi shkuar në fund. Ose duhet të na vrasin. Megjithëse dikush e humbi jetën dhe prap nuk ka ndodhur asgjë. Na shtynë në fund të korridorit. Më pyetën kush je.
I them emrin dhe mbiemrin. Mirë më thotë ulu. Në momentin që ulem më gjuan me shkelm. Kaq, komunikimi më i madh që kam pasur me policët atë natë. E kam pyetur pse më ke marrë telefnonin nuk ma ka kthyer përgjigje. Para se të fusnin në makinë polici më qëllon. As nuk e kundërshtoj, nëse e pyetura është kundërshtim këtë nuk e di”, tha ai.
Po ashtu edhe aktivisti Astrit Seranaj rrëfeu se si u dhunua nga policia gjatë shoqërimit, por edhe në ambientet e komisariatit.
Ndërkohë për gati dy orë para ministrisë së Brendshme u zhvillua një protestë nga aktivistët e Aleancës për Mbrojtjen e Teatrit e cila ishte e qetë, pa incidente.
