Infarkti nuk shkaktohet vetëm nga kolesteroli i lartë në arterie ose thjesht nga kequshqyerja apo mosha e madhe e një personi. Ndonjëherë kjo gjë ndodh edhe si pasojë e rrethanave të jashtme. Ja disa këshilla se si mund të shmangni faktorët që mund të shkaktojnë infarktin
Temperaturat e larta
Sipas statistikave ndërkombëtare, i nxehti shkakton infarkt. Bëhet fjalë për një reagim të organizmit jo vetëm nga temperaturat e larta, por edhe nga dehidratimi, faktorë që e bëjnë gjakun më të trashë. Përveçse nuk duhet të dilni në orët më të nxehta dhe aq më pak të bëni ushtrime fizike, një zgjidhje e mirë për të luftuar të nxehtin është që të pini sa më shumë ujë gjatë gjithë ditës për të hidratuar organizmin.
Bëni kujdes me dushin e nxehtë
Çuditërisht, banjat me ujë shumë të ngrohtë kanë të njëjtin efekt si edhe dielli i nxehtë. Nëse ndryshimi mes temperaturave të jashtme (jashtë dushit) me ato të ujit është shumë i ndjeshëm, presioni i gjakut mund të bjerë papritmas për shkak të zgjerimit të enëve të gjakut. Ekspertët këshillojnë që uji i banjës ose i dushit të jetë i vakët, pak a shumë sa temperatura e trupit, ose rreth 36 gradë Celsius.
I ftohti i madh
Ashtu siç duhet të bëni kujdes me të nxehtin e madh, është e nevojshme që të tregoni kujdes edhe në rastin e kundërt, kur temperaturat janë shumë të ulëta, pasi këto të fundit nuk ndikojnë mirë për zemrën. Kjo konfirmohet nga fakti se rastet e infarktit janë më të shumta në mes të dimrit. Por cila është arsyeja? I ftohti i ngushton enët e gjakut, duke zvogëluar diametrin e tyre dhe gjaku në këtë mënyrë qarkullon me më shumë vështirësi dhe për rrjedhojë sasia e gjakut që shkon në zemër është më e paktë. Te personat në gjendje jo të mirë shëndetësore, rreziku rritet në mënyrë të konsiderueshme. Gjatë periudhës së dimrit, kur dilni, ju këshillojmë të visheni sa më trashë. Pra mbrohuni sa më shumë ndaj të ftohtit.
Virusi herpes
Pjesa më e madhe e popullsisë ka qenë e ekspozuar ndaj virusit herpes zoster, i shkaktuar nga varicela (lija), ndërsa sot është bërë e ditur se ky mikrob rrit rrezikun e atakut të zemrës si dhe atë cerebral. Arsyeja e kësaj lidhjeje është ende e panjohur, por është parë se, personat nga 18 në 40 vjeç, me një histori herpesi, janë veçanërisht të ndjeshëm ndaj ngjarjeve të tilla kardiovaskulare.
Ngrënia në orët e vona të natës
Në shumë vende është e zakonshme të hash darkë përpara orës 7:00 të mbrëmjes, ndërsa në vende të tjera hahet nga ora 9:00-10:00 e natës. Por kjo gjë duket se nuk është shumë e shëndetshme, as për një gjumë të qetë dhe as për mirëqenien e zemrës. Gjendja përkeqësohet sidomos te meshkujt, pasi ata ushqehen shpeshherë në orë të vona. Është vërtetuar se personat me këtë mënyrë jetese, vuajnë nga mbipesha, hipertensioni, rezistenca e insulinës dhe përqendrimi i lipoideve (yndyrave në gjak). E gjithë kjo përcakton një rritje të rrezikut të sëmundjeve koronare të zemrës deri në 27%.
Ndotja
Nëse në ajrin që thithim, përqendrimi i O3 (Ozoni 3) tejkalon 10 g/m³, efektet që shkaktohen tek arteriet që ushqejnë zemrën dhe trurin janë negative. Këto nivele ndotjeje e përkeqësojnë gjendjen e shëndetit të personave të cilët vuajnë nga një shqetësim në muskujt e zemrës.
Zhurma e avionëve
Të jetosh pranë një aeroporti përbën rrezik për shëndetin e zemrës. Është demonstruar se personat që jetojnë në këto zona, kanë 20% më shumë të ngjarë të vuajnë nga sëmundjet kardiovaskulare, pas rritjes së tensionit të gjakut që shkaktohet nga zhurmat.
Trishtimi
Nëse ndiheni të trishtuar për diçka dhe nuk dini se si të “dilni” nga kjo gjendje, atëherë kërkoni ndihmë. Është e rëndësishme që të riktheheni të jeni “vetvetja”, jo vetëm për shëndetin fizik, por edhe sepse mërzitjet e dëmtojnë zemrën. Në këto kushte, një person kapërcen vaktet e ngrënies dhe të fjetjes, ndërsa sasia e kortizolit në organizëm rritet.
