Janë çuar në këmbë të gjithë ndërkombëtarët, por edhe opozita në Kosovë dhe bëjnë trysni kryeministrit Albin Kurti për formimin e asociacionit të komunave me shumicë serbe!
Madje, opozita në Kosovë, disi na del si e kënaqur nëse Kurtit i duhet ta bëjë këtë, pa e menduar se edhe nëse po, ky është gatuar nga vetë opozita e sotme kur ishin në pozitë.
E unë kam një pyetje për të gjithë ata që kërkojnë themelimin e këtij Asociacioni se, kush do të mbetet më i fortë, Republika e Kosovës apo Asociacioni, cili mund ta dirigjojë tjetrin? Po dua t’i bijë si shkurt: Mund ta zhbëjë Republikën e Kosovës në të ardhmen Asociacioni që do të lind nga kjo vetë, apo Asociacionin një ditë, sipas nevojë, mund ta zhbëjë Republika e Kosovës?
Po e shtroj këtë pyetje se, nuk do të mund të shkojnë gjatë bashkë!
Populli ynë, me kohën e ka një fjalë të urtë që thotë:
DY ATLLARË NUK BËJNË NË NJË MULLAR!
Pra, nuk do të mund të jenë edhe këto me të drejta të barabarta bashkë. Njëra duhet të ketë më shumë të drejta. E, me sa po shihet, deri sa Qendra nuk do të mund të ndërhyjë në Asociacionin serb, do të thotë se, Asociacioni do të ndërhyjë në Qendrën (kupto: Republikën e Kosovës) dhe dalëngadalë do ta zhvlerësojë deri sa ta hajë e do ta zhbëjë tërësisht.
Prandaj, ju lutemi, duhet të keni kujdes. Të sqarohet mirë kush deri ku mund të shkojë.
Nëse, Ministritë nuk do të kenë ingerenca mbi drejtoritë e formuara nga Asociacioni, atëherë nuk do të jetë në rregull, pse asnjëra nuk do ta pyet tjetrën, apo drejtoritë e dala nga Asociacioni do të dalin më të forta, pse do të punojnë kokë më vete. Kjo nuk ka ndodhur në asnjë vend, në asnjë shtet deri sot. Kjo do të jetë vetëvrasje e Republikës së Kosovës.
Prandaj, për fund, shtroj pyetjen:
Me asociacionin e Komunave me Shumicë Serbe, a më i fortë do të jetë Asociacioni i këtyre komunave, apo Republika e Kosovës?
Natyrisht, kisha dashur të marrë përgjigje në këtë pyetje.
